«Այս իշխանությունների՝ լեզվի նկատմամբ ոտնձգությունն անդրադարձել է դասագրքերի վրա»․ Կարին Տոնոյան

«Այս իշխանությունները ոտնձգել են լեզվի նկատմամբ և դրա ուղիղ արտահայտումն անդրադարձել է դասագրքերի և հատկապես այբբենարանի վրա»,- աշխատաժողովի ժամանակ, շարունակելով իր ելույթն, ասաց Հասարակական գործիչ Կարին Տոնոյանը։ «Լեզուն մնացել է մեր վերջին դիրքը, եթե թույլ տանք, որ մեր լեզվի հետ էլ անեն, ինչ ուզում են, ապա ուղղակի իրավունք չունենք տեսակ կոչվելու։ Մենք պետք է պայքարենք մեր տեսակի համար։ Շատերն ասում են՝ այս ամենն, ինչ կատարվում է դասագրքերի, այբբենարանի հետ պատահականություն է։ Անգամ, եթե պատահական է, ապա այդպիսի պատահական սխալներ թույլ տվող անձինք իրավունք չունեն մոտենան դասագրքերին, որոնք սրբազան պատուհան են դեպի կյանք»,- ասաց Տոնոյանը՝ նշելով, որ իրականում լեզուն է մեր տերը և պետք է տեր կանգնել այդ լեզվին․ «Նստենք, նայենք, թե ինչպե՞ս են այսօրվա իշխանությունները ավիրում ամեն ինչ։ Մենք, որպես արժանապատվությունը վաճառքի չհանած մարդիկ, ուզում ենք հնարավորություն տալ մարդկանց միանալ մեր պայքարին՝ հայ մնալու իրավունք ունենալու համար։ Հասկանում ենք, որ ռեպրեսիաները մեզ էլ են հասնելու, Միքայել և Բագրատ Սրբազաններից հեղինակավոր չենք, բայց դա մեզ չի կանգնեցնի, մեր պայքարը շարունակելու ենք»,- ասաց Տոնոյանը՝ կոչ անելով այսօրվա դասագրքերի հեղինակներին՝ չտրվել ճնշումներին և միանալ պայքարին։