Իսրայելը ոչնչացրել է ՀԱՄԱՍ-ի առանցքային ֆինանսագետին

Իսրայելցի զինվորականները ոչնչացրել են Գազայի հատվածում պաղեստինյան ՀԱՄԱՍ շարժման առանցքային ֆինանսագետներից մեկին։ Այս մասին հայտարարել է բանակի մամուլի ծառայությունը։

Տեղեկությունների համաձայն՝ մեկ շաբաթ առաջ Իսրայելի պաշտպանության ուժերի և Գլխավոր անվտանգության ծառայության կողմից Գազա քաղաքում իրականացվել է հատուկ գործողություն, որի թիրախը Ջասեր Հուսեյն Ալի Շամիան է եղել։ Իսրայելի զինվորականների տվյալներով՝ նա «պատասխանատու էր Համասի ռազմական թևի համար միջոցներ հայթայթելու համար և նախկինում ծառայել է որպես գումարտակի հրամանատար ՀԱՄԱՍ-ի Գազայի բրիգադում»։

«Պատերազմի սկզբից ի վեր Շամիան պատասխանատու է եղել ՀԱՄԱՍ-ի ռազմական թևին տասնյակ միլիոնավոր դոլարներ փոխանցելու համար։ Այս միջոցներն օգտագործվել են ռազմական թևի ամրապնդման, ահաբեկիչներին աշխատավարձ վճարելու և ահաբեկչական կազմակերպությունն ամբողջությամբ ֆինանսավորելու համար։ Բացի այդ, դա թույլ է տվել շարունակել ռազմական գործողությունները և պահպանել բրիգադների ներկայությունը Գազայի հյուսիսում»,- ասված է իսրայելական գերատեսչության հաղորդագրության մեջ: