Իրանի և ԱՄՆ-ի պատվիրակությունների միջև մայիսի 3-ին նախատեսված բանակցությունները հետաձգվել են

Իրանի և ԱՄՆ-ի պատվիրակությունների միջև մայիսի 3-ին նախատեսված բանակցությունները հետաձգվել են։ Այս մասին հայտարարել է Օմանի արտաքին գործերի նախարար Բադր բին Համադ ալ-Բուսաիդին։

Նախարարի խոսքով՝ սա արվել է «լոգիստիկ պատճառներով»։

Ավելի վաղ Axios-ը, հղում անելով տեղեկացված աղբյուրներին, հայտնել էր, որ Իրանի և Միացյալ Նահանգների միջև բանակցությունների չորրորդ փուլը, որը նախատեսված էր շաբաթ օրը՝ մայիսի 3-ին, և պետք է տեղի ունենար Հռոմում, ամենայն հավանականությամբ, կհետաձգվի մինչև հաջորդ շաբաթ։ Այս ֆոնին, Իրանի հանդիպումը Մեծ Բրիտանիայի, Ֆրանսիայի և Գերմանիայի ներկայացուցիչների հետ նույնպես կարող է հետաձգվել։ Հետաձգման պատճառները չեն նշվում։
ԱՄՆ-ն դեռևս չի հաստատել, որ մասնակցելու է միջուկային ծրագրի վերաբերյալ իրանական պատվիրակության հետ խորհրդակցությունների չորրորդ փուլին, հաղորդում է Reuters-ը՝ հղում անելով իր աղբյուրին։

Նրա խոսքով՝ բանակցությունների հաջորդ փուլի ժամանակն ու վայրը դեռևս հաստատված չեն, բայց դրանք պետք է հայտարարվեն մոտ ապագայում։

Միևնույն ժամանակ, Իրանի արտաքին գործերի նախարարությունը ևս հաստատել է, որ Իրանի միջուկային ծրագրի շուրջ Միացյալ Նահանգների հետ բանակցությունների չորրորդ փուլը հետաձգվել է։

«Բանակցությունների ամսաթվի փոփոխությունը հիմնված է Օմանի արտգործնախարար Բադր ալ-Բուսաիդի առաջարկի վրա։ Հաջորդ հնարավոր ամսաթվի վերաբերյալ տեղեկատվությունը կտրամադրվի ավելի ուշ», - հայտարարության մեջ մեջբերվել է Իրանի արտգործնախարարության խոսնակ Էսմայիլ Բաղայիի խոսքերը։