«Գործ ունենք ՀՀ ազգային անվտանգության դեմ գործող խմբի հետ»․ Արամայիս Աղաբեկյան

Արցախի ԱԺ պատգամավոր Արամայիս Աղաբեկյանի ֆեյսբուքյան գրառումը. «Այս ռեժիմի դեմ պայքարում կարևոր է գիտակցել, որ գործ ունենք ՀՀ-ի ազգային անվտանգության դեմ գործող խմբի հետ, որը պատրաստ է ամեն ինչի հանուն նրա, որպեսզի հնարավորինս երկար պահի իշխանությունը։ Իրական դիմադրությունն այս իրավիճակում ենթադրում է ռիսկեր, գիտակցում, որ վտանգի դեպքում լինելու է լրջագույն հակազդեցություն։ Այդ նպատակին առաջնահերթորեն ծառայելու են ուժային կառույցներն ու Նիկոլի խիստ կազմակերպված տեղեկատվական բանակը։
Ինչ գործիքներ կան և ինչպես պայքարել, եթե կա դիմադրություն ցույց տալու կամք և պատրաստակամություն։ Հիմնական գործիքները երեքն են, որոնց տակ կարելի է տեղավորել այն ամենը, ինչ կգա ձեր գլխին այս գրառումը կարդալիս՝ Տեղեկատվական, Իրավական և Քաղաքական։ Ես չեմ խորանալու գլոբալ անելիքների մեջ, քանզի մեկնաբանների և պատմիչների պակաս չկա, ես ասելու եմ այն, ինչ կարող եմ անել և այն, ինչով կարող է աջակցել ինձ իմ ընթերցողը։
Սկսենք տեղեկատվականից։
Ունեմ մոտ 100 000 լսարան ֆեյսբուքում և տելեգրամում, որի միջոցով տարածում եմ ռեժիմի կողմից իրականացված ցանկացած ապօրինության մասին տեղեկատվություն և լուսաբանում եմ նրա դեմ դուրս եկող ցանկացած քաղաքական խմբի կամ անհատի ակտիվ գործունեությունը իմ տեսադաշտի շրջանակներում։ Ինձ այս հարցում օգնելու ցանկություն ունեցողները կարող են անձնական նամակով տեղեկություններ փոխանցել թե՛ ռեժիմի կողմից իրականացվող ապօրինությունների մասով, թե՛ գոյություն ունեցող դիմադրության օջախների գործունեությունը լուսաբանելու համար։
Իրավական գործիք։
Հնարավորության սահմաններում հանցագործությունների մասին հաղորդումներ եմ ներկայացնում։ Եթե դուք էլ տիրապետում եք ռեժիմի կամ նրան ծառայող անհատների կողմից օրենքի ակնհայտ խախտումներին, կարող եք ինձ տեղեկացնել։ Ինձ օգնելու պատրաստակամություն է հայտնել երկու իրավաբան, որի համար շատ շնորհակալ եմ։ Ցանկացած հանցագործության մասով, որը կվտանգի ՀՀ ազգային անվտանգությունը և կվերաբերի հանրային շահին, ես պատրաստ եմ իմ անունով հաղորդում ներկայացնել և անձամբ մտնել այդ պայքարի մեջ։
Քաղաքական մասով։
Այս պահին գնում են հանդիպումներ և կոնսուլտացիաներ, նպատակը՝ ինքնաֆինանսավորվող, կազմակերպված մարմին ստեղծելն է, որը ի զորու կլինի ինքն իրենով հարցեր լուծել։
Վստահ եմ՝ ձեր ուղեղում նաև այլ գործիքներ և լուծումներ կան, բաց եմ քննարկումների համար։ Խնդրում եմ մաքսիմալ տարածել այս գրառումը՝ համագործակցության եզրերի հնարավորությունը և մարդկանց ընդգրկվածությունը ապահովելու համար»։