«Ճանապարհներ եք կառուցում՝ Ադրբեջանին հանձնելո՞ւ, թե՞ մեր քաղաքացիների համար»․ Էդգար Ղազարյանը՝ Քրիստինե Ղալեչյանին

ԱԺ պաշտպանության և անվտանգության հարցերի մշտական հանձնաժողովի նախաձեռնությամբ կազմակերպվել են «Ճանապարհային երթևեկության անվտանգությունը ՀՀ-ում» թեմայով խորհրդարանական լսումներ: ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը ներկայացրեց իրականացվող ճանապարհաշինական աշխատանքները։ Նրա ելույթին արձագանքելով՝ հասարակական, քաղաքական գործիչ Էդգար Ղազարյանը մի քանի հարցեր ուղղեց․ «Ներկայացնում եք մի կառավարություն, որի գործողությունների հետևանքով թշնամուն են հանձնվել հարյուրավոր կիլոմետրերով ճանապարհներ։ Կարո՞ղ եք վիճակագրություն ներկայացնել, թե ձեր կառավարման շրջանում՝ 2020 թվականից հետո, քանի՞ կմ և ի՞նչ նշանակության ճանապարհներ են հանձնվել թշնամուն։
Հաջորդ հարցը՝ Նիկոլ Փաշինյանը 2024 թվականի օգոստոսից պարբերաբար հայտարարում է, որ համաձայն Ադրբեջանի Սահմանադրության, ՀՀ ներկայիս տարածքի 60-70%-ն ունի ադրբեջանական պատկանելիություն։ Ճանապարհաշինական աշխատանքներ իրականացնելիս հաշվի առնո՞ւմ եք դա, այսինքն՝ ճանապարհներ կառուցում եք Ադրբեջանին հանձնելո՞ւ համար, թե՞ մեր քաղաքացիներին ծառայություններ մատուցելու համար»,- հարցրեց Էդգար Ղազարյանը։
Փոխնարարաը պատասխանեց, որ ծրագրեր իրականացնելիս ղեկավարվում են կառավարության որոշմամբ սահմանված ճանապարհային ցանկով, և որ այլ մեկնաբանություն չունի։
«Ցավում եմ, որ խուսափում եք հարցերին պատասխանել, ինչն այս կառավարության գործելաոճն է։ Իսկ ձեր այդ անվանացանկում ներառվա՞ծ է Երևան-Մեղրի միջպետական ճանապարհը և դուք կարո՞ղ եք այս լսումներից հետո անվտանգ երթևեկել միջպետական այդ ճանապարհի Գորիս-Կապան հատվածով»,- շարունակեց Ղազարյանը։ Նրան ի պատասխան՝ փոխնախարարը մատնանշեց, որ Մ2 ճանապարհը դեպի Մեղրի անցնում է Տաթևով։