Մախաչկալայում պայթյուններ են տեղի ունեցել, կան վիրավորներ

Մախաչկալայում այսօր առավոտյան կես ժամվա տարբերությամբ 2 խոշոր պայթյուն և հրդեհ է տեղի ունեցել, կան վիրավորներ:

Առաջինը կենցաղային գազի պայթյունն էր բնակելի շենքերից մեկում: Բռնկված հրդեհը տարածվել է բնակարաններում, շենքի քարերն ընկել են կայանված ավտոմեքենաների վրա: 150 մարդ տարհանվել է։

Նախնական տվյալներով՝ երկու մարդ վիրավոր է, նրանց վիճակը գնահատվում է ծանր, հայտնում են Դաղստանի Հանրապետության ՆԳՆ-ից։

Երկրորդ պայթյունը տեղի է ունեցել բջջային կապի սրահում. տուժել է երեք մարդ։ Mash-ի փոխանցմամբ՝ գազի բալոնը պայթել է ոչ թե բջջային կապի սրահում, այլ՝ սրահին կից բիստրոյում։