«Ուկրաինայում անվտանգության երաշխիքների հարցը դեռ քննարկման փուլում է»․ Ֆիդան

Ուկրաինայի հակամարտության կարգավորման շրջանակներում անվտանգության երաշխիքների հարցը ներկայումս քննարկման փուլում է։ Այս մասին հայտարարել է Թուրքիայի ԱԳՆ ղեկավար Հաքան Ֆիդանը։

«Ռուսաստանի և Ուկրաինայի միջև պատերազմի համատեքստում այսօր հասել ենք մի կետի, երբ ամերիկյան նոր վարչակազմը առաջ է քաշում խաղաղության օրակարգ, և դա, անշուշտ, ողջունելի զարգացում է մեր տարածաշրջանի և ողջ մարդկության համար», ասել է Ֆիդանը:

«Մյուս կողմից, երբ խոսքը վերաբերում է խաղաղ լուծմանը, առաջ է գալիս անվտանգության երաշխիքների հարցը: Այս թեմայի շուրջ քննարկումները, ուսումնասիրությունները և լուծումների որոնումները շարունակվում են տարբեր մակարդակներով ու տարբեր ձևաչափերով: Որպես երկիր՝ մենք կշարունակենք հնարավոր աջակցություն ցուցաբերել ինչպես հրադադարին, այնպես էլ համապարփակ խաղաղ բանակցություններին»,- հավելել է Թուրքիայի արտգործնախարարը: