«ՌԴ-ն անհանգստացած է հայ-ադրբեջանական սահմանին լարվածության աճով»․ Զախարովա

Ռուսաստանին անհանգստացնում են հայ-ադրբեջանական սահմանին լարվածության աճի մասին լուրերը՝ Բաքվի և Երևանի միջև խաղաղության պայմանագրի առաջընթացի ֆոնին, ասել է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք չենք կարող չանհանգստանալ, որ առաջընթացի և Ադրբեջանի ու Հայաստանի միջև խաղաղության համաձայնագրի նախագծի հաստատման մասին լուրերի ֆոնին վերջին շրջանում, ցավոք, ավելի հաճախ ենք լսում երկու երկրների սահմանին լարվածության աճի մասին», - ասել է նա։
«Մոսկվան իր գործընկերներին կոչ է անում զսպվածություն ցուցաբերել և խուսափել գործողություններից, որոնք կարող են հանգեցնել իրավիճակի սրման», հավելել է Զախարովան՝ միևնույն ժամանակ ակնարկելով, թե Երևանից ժամանակ կպահանջվի ՀԱՊԿ-ի հետ հարաբերությունները վերականգնելու համար։

Հիշեցնենք, որ վերջին մի քանի օրվա ընթացքում Ադրբեջանի պաշտպանության նախարարությունն ապատեղեկատվություն էր տարածում՝ հայ-ադրբեջանական սահմանին ՀՀ զինված ուժերի կողմից կրակ բացելու վերաբերյալ։ ՀՀ պաշտպանության նախարարությունը հերքել է այս հայտարարությունները։