«Արևմուտքի հետ դաշինքը Հայաստանի ինքնիշխանությունն ամրապնդելու միակ ռեալ ուղին է»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «Պետության իրական ուժը միջազգային ինտեգրման, տնտեսական զարգացման և անվտանգության ամրապնդման մեջ է։ Ադրբեջանը ժամանակին կորցրեց տարածքներ, բայց հասկացավ, որ իր ուժը զարգանալու, աշխարհին ինտեգրվելու մեջ է։ Հակառակ բոլոր «կանխատեսումներին», կառուցեց իր էներգամուղներն ու կապվեց միջազգային տնտեսությանը, ձեռք բերեց ուժ, հետ բերեց կորցրածը:
Հայաստանը կորցրել է տարածքներ, բայց շարունակում է մնալ կախվածության մեջ այն նույն մտածողությունը, որն իրեն հասցրեց այս կետին։ Արցախի կորստից հետո չի դադարել, այլ նույնիսկ ավելի է խորացել ռուսական համակարգված հոգեբանական պատերազմը Հայաստանի ներսում։ Դրա նպատակը պարզ է՝ հանրային պառակտում, կառավարման ամբողջական կաթված, երկրի ռազմավարական ապագայի նկատմամբ վերահսկողության կորուստ։ Հայաստանին ցանկանում են պահել մշտական անկայունության մեջ՝ որպես գործիք, որը կծառայի միայն արտաքին շահերին։
Հայկական պետականության հարատևության միակ ճանապարհն արևմտյան անվտանգության համակարգի մաս դառնալն է։ Դրան այլընտրանք չկա։ Ոչ մի «ռուսական երաշխիք» 30 տարի չգործեց: Չգործեց 2016-ին, չգործեց 2020-ին, չգործեց 2021-ին, 22, 23-ին Արցախում, չի գործելու ապագայում։
Ռուսաստանը տասնյակ տարիներ հարձակողական զենք վաճառեց Ադրբեջանին՝ քաջ իմանալով, որ այն օգտագործվելու է ընդդեմ Հայաստանի:
Ռուսաստանն ու Ադրբեջանը շարունակելու են օգտագործել Հայաստանը, քանի դեռ Հայաստանը չի պարտադրել իր օրակարգը և չի փոխել իր դաշնակիցներին։
Արևմուտքի հետ դաշինքը Հայաստանի ինքնիշխանությունն ամրապնդելու միակ ռեալ ուղին է։ Ոչ մի խաղաղություն հնարավոր չէ այնտեղ, որտեղ ներկա է Ռուսաստանն ու նրա ազդեցությունը։ Ռուսաստանի ներկայությունը տարածաշրջանում նշանակում է միայն անկայունություն, արհավիրք և պատերազմ։
Եթե Հայաստանը ցանկանում է ապագա ունենալ, պետք է արագ, վճռական ու անհապաղ դուրս գա ռուսական կախվածությունից, խորացնի ԵՄ-ի և ԱՄՆ-ի հետ ռազմավարական հարաբերությունները և ապահովի իր ազգային շահերի միջազգային երաշխավորությունը։
Կեղծ չեզոքությունն ու լարախաղաղությունն ու այսպես կոչված տարածաշրջայնացման քաղաքկանությունն այս իրավիճակում ծայրահեղ վտանգավոր է։ Հայաստանը պետք է հայտարարի իր ռազմավարական ընտրության մասին, իր իրական դաշնակիցների հետ, և նրանց աջակցությամբ փոխի իր արտաքին քաղաքական վեկտորը, հակառակ դեպքում՝ կորցնելու է ամեն ինչ»։