«Թրամփը դեմ է Արևելյան Եվրոպայում միջուկային զենքի տեղակայմանը»․ Վենս

ԱՄՆ նախագահ Դոնալդ Թրամփը չի պաշտպանում Արևելյան Եվրոպայում միջուկային զենք տեղակայելու գաղափարը, Fox News-ին տված հարցազրույցում ասել է փոխնախագահ Ջ.Դ.Վենսը։

«Ես չեմ քննարկել այդ հարցը նախագահի հետ, բայց ես կապշեի, եթե նա աջակցեր միջուկային զենքի տեղակայմանն ավելի հեռու՝ Արևելյան Եվրոպայում: Խոսքը մարդկային քաղաքակրթության ապագայի մասին է»,- ասել է Վենսը։

Ավելի վաղ Լեհաստանի նախագահ Անջեյ Դուդան Financial Times-ին տված հարցազրույցում ԱՄՆ-ին կոչ էր արել միջուկային զենք տեղակայել Լեհաստանում՝ որպես Ռուսաստանի դեմ զսպող միջոց։ ՆԱՏՕ-ի ենթակառուցվածքները «պետք է տեղափոխվեն դեպի արևելք», - ասել է նա, քանի որ դաշինքի սահմանները նույնպես տեղաշարժվեցին դեպի արևելք 1999 թվականին, երբ Լեհաստանը միացավ ՆԱՏՕ-ին: