Ալավիները պաշտպանություն են խնդրել Իսրայելի կառավարությունից. #i24

Սիրիայում ալավիների համայնքի ղեկավարները նամակ են ուղարկել Իսրայելի վարչապետ Բենիամին Նեթանյահուին և իսրայելցի այլ պաշտոնյաներին՝ խնդրելով «փրկել» իրենց սիրիական նոր իշխանությունների հետապնդումներից։ Այս մասին հայտնում է РИА Новости-ն՝ հղում կատարելով i24news հեռուստաալիքին։

«Բաշար Ասադի ռեժիմի տապալումից և ալավիներով բնակեցված շրջաններում տեղի ունեցած ջարդերից հետո, մենք Իսրայելի կառավարությանը կոչ ենք անում պաշտպանություն, օգնություն և աջակցություն ցուցաբերել»,- հեռուստաալիքի փոխանցմամբ՝ ասվում է նամակում։

Համայնքի ղեկավարներն Իսրայելին կոչ են արել նաև օգտագործել զինված ուժերը՝ պաշտպանելու Սիրիայի մերձափնյա շրջանի խաղաղ բնակիչներին:

Հիշեցնենք, որ անցյալ շաբաթվանից կատաղի բախումներ են տեղի ունենում սիրիական Լաթաքիա և Տարտուս նահանգներում՝ անվտանգության ուժերի և նախկին նախագահ Բաշար ալ-Ասադի կողմնակիցների միջև։

Վերջին տվյալներով՝ բախումների հետևանքով 1000-ից ավելի մարդ է զոհվել: