Սիրիայում Ասադի կողմնակիցներն ապստամբել են իսլամիստների դեմ

Սիրիայում ալավիների ապստամբություն է սկսվել «Հայաթ Թահրիր ալ-Շամի» իսլամիստների դեմ, որոնք զավթել են իշխանությունը։ Այս մասին մարտի 6-ի երեկոյան հայտնել է Reuters-ը։
Գործակալության տվյալներով՝ Լաթաքիայում կատաղի բախումներ են տեղի ունենում կառավարական զորքերի և ալավիական ջոկատների միջև, որոնք եղել են Բաշար ալ-Ասադի կառավարության հենարանը։

Հաղորդվում է, որ առնվազն 13 գրոհային է սպանվել Ջաբլա շրջանում, որտեղից սերում է Ասադի ընտանիքը:

Ապստամբության խթան է հանդիսացել «Հայաթ Թահրիր ալ-Շամի»-ի կողմից Լաթաքիայի գյուղերից մեկը «մաքրելու» փորձը։ Իսլամիստներն այնտեղ ռազմական դիմադրություն են ստացելև սկսել են հրետանուց գնդակոծել բնակավայրը։

Դա հանգեցրել է անկարգությունների հարևան Ջաբլի և Խմեյմիմ բնակավայրերում (վերջինս ռուսական ավիաբազան է): Բողոքի ցույցեր են սկսվել Լաթաքիա և Տարտուս քաղաքներում։
Համացանցում հայտնված տեսանյութում երևում է, թե ինչպես են ապստամբները բարձրացնում Ալավիների դրոշը Աս-Սուվեյդա նահանգում գտնվող ոստիկանական շտաբի վրա և գրոհում ռազմական քոլեջը, որը իշխող իսլամիստական ​​խմբավորման բազան էր:

Հաղորդվում է, որ ապստամբները «Հայաթ Թահրիր ալ-Շամի»-ի զինյալներին դուրս են մղել այս բնակավայրերից՝ սպանելով նրանցից մի քանիսին։

Միաժամանակ տեղեկություններ կան, որ «Հայաթ Թահրիր ալ-Շամի»-ն արդեն համալրումներ է ուղարկել շրջան Հալեպից, Համայից և Դամասկոսից։

Ավելի վաղ հաղորդվել էր, որ Ռուսաստանի և Սիրիայի նոր իշխանությունների միջև բանակցությունները Տարտուսում և Լաթաքիայում ռուսական երկու ռազմաբազաների պահպանման շուրջ ընթանում են դրական հունով։