Սիրիայի բանակը վերահսկողության տակ է վերցրել Լաթաքիան

Սիրիայի անցումային կառավարության անվտանգության ուժերը վերահսկողության տակ են վերցրել Լաթաքիա քաղաքը՝ հեռացնելով երկրի նախկին նախագահ Բաշար ալ-Ասադի զինված կողմնակիցներին։ Այս մասին Լաթաքիայի ոստիկանապետը հայտնել է քաթարյան Al Jazeera հեռուստաալիքին տված մեկնաբանությունում։

«Քաղաքը վերահսկողության տակ է վերցվել, վերացվել է ռազմական օբյեկտների շրջափակումը, իսկ նախկին ռեժիմի մնացորդները դուրս են քշվել»,- ասել է նա։

Ավելի վաղ սիրիական լրատվամիջոցները հայտնել էին, որ Սիրիայի զինված ուժերը գրավել են Լաթաքիայի և Տարտուսի կենտրոնական շրջանները, մասնավորապես Տարտուսի նահանգի Բանիյաս քաղաքը, և շարունակում են այդ նահանգների տարածքները մաքրել այնտեղ թաքնված զինյալներից։

Հիշեցնենք, որ նախօրեին զինված բախումներ են տեղի ունեցել կառավարության ուժերի և Սիրիայի նախկին նախագահին սատարող ալավիտական ջոկատների միջև։

Վերջին տվյալներով՝ Սիրիայում զինված բախումների արդյունքում 48 մարդ է մահացել։