«Վաշինգթոնը պետք է շարունակի երկխոսությունը Մոսկվայի հետ՝ չնայած տարաձայնություններին»․ Ռուբիո

Վաշինգթոնը պետք է շարունակի երկխոսությունը Մոսկվայի հետ՝ չնայած տարաձայնություններին, քանի որ Ռուսաստանը շարունակում է մնալ համաշխարհային տերություն, հայտարարել է ԱՄՆ պետքարտուղար Մարկո Ռուբիոն X սոցիալական ցանցում հրապարակված հարցազրույցում։
«Վերջիվերջո, ուզենք թե չուզենք, Ռուսաստանը գերտերություն է: Նրանք ազդեցություն ունեն Սիրիայում, ներգրավված են Մերձավոր Արևելքում, անգամ՝ արևմտյան կիսագնդում, իհարկե, Եվրոպայում: Մենք պետք է նրանց հետ ինչ-որ շփում ունենանք»,- ասել է Ռուբիոն:
«Առաջին քայլը պետք է լինի Մոսկվայում մեր դեսպանատան աշխատանքը վերականգնելը, որն այժմ գրեթե չի գործում»,- ասել է նա։

Անդրադառնալով Էր Ռիադում կայացած բանակցություններին՝ Ռուբիոն նշել է, որ ԱՄՆ-ն և Ռուսաստանը տարածքային հարցեր չեն քննարկել և հանդիպումն այլ նպատակ ուներ, չի քննարկվել նաև պատժամիջոցների վերացման հարցը։

«Քննարկումները դեռ չեն հասել այդ փուլին», - ասել է ԱՄՆ պետքարտուղարը: