Բաքվի դատարանում որպես կազմակերպիչներ նշվել են Ռոբերտ Քոչարյանը, Սերժ Սարգսյանը, Վազգեն Մանուկյանը, Սամվել Բաբայանը և այլք

Բաքվի դատարանում հերթական լսումն է տեղի ունեցել բռնազավթված Արցախի Հանրապետության գերեվարված ղեկավարների շինծու դատական գործով, որոնք մեղադրվում են «Ադրբեջանի դեմ ռազմական հանցագործությունների» համար։

Ինչպես հայտնում է Report-ը, գործը վարում է Բաքվի ռազմական դատարանի նախագահ Զեյնալ Աղաևը։

Մեղադրյալներից յուրաքանչյուրին տրամադրվել են թարգմանիչներ իրենց հասկանալի լեզվով, ինչպես նաև փաստաբաններ՝ նրանց պաշտպանության համար:

Գործով ամբաստանյալները 15-ն են՝ Արկադի Ղուկասյանը, Արայիկ Հարությունյանը, Բակո Սահակյանը, Դավիթ Իշխանյանը, Դավիթ Բաբայանը, Լյովա Մնացականյանը, Դավիթ Մանուկյանը, Գարիկ Մարտիրոսյանը, Մելիքսեթ Փաշայանը, Դավիթ Ալլահվերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը:

Դատական ​​նիստին մասնակցում էին, այսպես կոչված, «տուժողները», նրանց իրավահաջորդներն ու ներկայացուցիչները, պետական ​​մեղադրող կողմին աջակցող դատախազները, ինչպես նաև Նախարարների կաբինետի ղեկավար Ռուֆաթ Մամեդովը, ով որպես տուժող հանդես է գալիս Ադրբեջանի անունից։

«Նիստում հայտարարվել են մեղադրական եզրակացության դրվագներ՝ կապված Հայաստանի Հանրապետության և նրա անմիջական ղեկավարությամբ հանցավոր համայնքի կողմից մղված ագրեսիվ պատերազմի ընթացքում կատարված հանցագործությունների հետ։ Հանցագործությունները կատարվել են բանավոր և գրավոր հրամանների, ցուցումների և հրահանգների հիման վրա՝ Հայաստանի, նրա պետական ​​կառույցների, պաշտոնատար անձանց, զինված ուժերի և ապօրինի զինված կազմավորումների նյութական, տեխնիկական և կադրային աջակցությամբ, կենտրոնացված կառավարման և խիստ վերահսկողության ներքո։

Որպես կազմակերպիչներ և մասնակիցներ՝ նշվել են Ռոբերտ Սեդրակի Քոչարյանը, Սերժ Ազատի Սարգսյանը, Վազգեն Միքայելի Մանուկյանը, Վազգեն Զավենի Սարգսյանը, Սամվել Անդրանիկի Բաբայանը, Վիտալի Միքայելի Բալասանյանը, Զորի Հայկի Բալայանը, Սեյրան Մուշեղի Օհանյանը, Արշավիր Սուրենոի Գարամյանը, Մոնթե Չարլզի Մելքոնյանը և այլք։ Հայտարարվել են նաև Ադրբեջանի ռազմական զինանոցին և քաղաքացիական ենթակառուցվածքներին հասցված նյութական վնասի չափերը»,- գրում են թշնամական երկրի լրատվականները։

Պետական ​​մեղադրողներ Ֆուադ Մուսաևը և Վյուսալ Աբդուլլաևն ընթերցել են մեղադրական եզրակացության այն մասը, որը վերաբերում էր «պատերազմի ընթացքում կատարված հանցագործություններին և այդ հանցագործություններին մեղադրյալների մասնակցությանը»։

Գործի նյութերի համաձայն՝ 1988 թվականից մինչև 2024 թվականը դիտավորյալ սպանվել է 18850 մարդ, այդ թվում՝ 3493 քաղաքացիական անձ և 15357 զինվորական։ Սպանության փորձ է կատարվել 56268 մարդու նկատմամբ, որից 4435-ը քաղաքացիական անձինք են, 51803-ը՝ զինվորականներ։