«Հնարավոր է ուրանալ պետությունը, սակայն ոչ թե ղեկավարի, այլ Նաիրի Հունանյանի խցակցի կարգավիճակում»․ Սուրեն Սուրենյանց

Քաղաքագետ, «Դեմոկրատական այլընտրանք» կուսակցության նախագահ Սուրեն Սուրենյանցի ֆեյսբուքյան գրառումը․ «Ազգակործան պատուհասի «մտքի գոհարները»․
«Եկել եմ մի եզրակացության, որ Հայաստանի 3-րդ հանրապետության հիմնադրման առաջին օրից, մենք չենք նկատել, որ ՀՀ-ում կար ընդամենը 1 կուսակցություն, դա ՀՅԴ-ն էր, իրականում եղել է մեկ կուսակցության գաղափարախոսություն: ՀՀ-ում, ըստ էության, գործող բոլոր կուսակցությունները գործել են Հայ Հեղափոխական Դաշնակցության գաղափարախոսության ներքո: ՀՀՇ-ին թվացել է, որ իրենք ավելի լավ դաշնակցական են, քան իսկական դաշնակցականները: ՔՊ-ին թվացել է, որ մենք ավելի լավ դաշնակցական ենք, քան՝ իսկական դաշնակցականները»,- ֆրանսահայ համայնքի հետ հանդիպմանն ասել է Նիկոլ Փաշինյանը։
Պատահական չեմ համարում, որ Երրորդ հանրապետությունը պետք է ազգային ողբերգության առաջ կանգներ հենց նման մտածողություն ունեցող ղեկավարի պաշտոնավարման շրջանում:
Հնարավոր է ուրանալ սեփական պետությունը, սակայն ոչ թե պետության ղեկավարի, այլ Նաիրի Հունանյանի խցակցի կարգավիճակում:
Հնարավոր է լինել տգետ, բայց չի կարելի այնքան հանդուգն լինել՝ այդ «առաքինությունը» պետության առաջնորդի դիրքերից ցուցադրելու համար:
Մեր Հանրապետությունը 88-ի համազգային շարժման ծնունդ է, հայ քաղաքական նոր մտքի, որը հաջողությամբ ձեռնոց նետեց թե՛ համայնավարական տոտալիտար մտածողությանը և թե՛, այսպես կոչված, ավանդական հայդատականությանը:
Առանց նման պատմական բեկման՝ չէին լինի ո՛չ Հանրապետության քաղաքակրթական հենքը, ոչ էլ հաղթանակն արցախյան առաջին պատերազմում»։