«Ձեր տեսլականը բերել է նրան, որ հիմա ԼՂ-ում հայ չկա»․ Ռուբեն Ռուբինյանը՝ ընդդիմադիրներին

«Ձեզ դուր է գալիս է բանավեճը իջեցնել պաթոսային հայտարարությունների դաշտ, բայց եկեք գանք փաստական դաշտ և 004 շրջաբերականի դաշտ»,- այս մասին հայտարարությունների ժամին նշեց ԱԺ փոխնախագահ Ռուբեն Ռուբինյանը՝ դիմելով ընդդիմադիր պատգամավորներին։

«Ի՞նչ է տեղի ունեցել 2022-2023 թվականներին ԼՂ-ում. եղել է երկու տեսլական. մեկը՝ Հայաստանի իշխանությունների տեսլականը, որ պետք է ԼՂ-ն ինքը բանակցությունների մեջ մտնի Ադրբեջանի հետ՝ ԼՂ ժողովրդի իրավունքների և անվտանգության թեմաներով․․․ Եվ եղել է Հայաստանի ընդդիմության տեսլականը, որ պետք է ամեն ինչ անել, որ ԼՂ-ն և Հայաստանը ենթարկեցնեն այլ պետությանը, Հայաստանը կորցնի իր սուվերենությունը, դրա համար, այդ թվում՝ ԼՂ-ում, պետք է անել իշխանափոխություն»,- նշեց Ռուբինյանը և դիմելով ընդդիմադիր պատգամավորներին՝ ընդգծեց՝ ձեր տեսլականը բերել է նրան, որ հիմա ԼՂ-ում հայ չկա։

Անդրադառնալով իշխանության տեսլականին՝ Ռուբինյանը նշեց․ «Մեզ ասում էիք դավաճաններ ու սրիկաներ․․․ Երբ ԼՂ-ում հայ կար, մենք ուզում էինք՝ այդ հայերը շարունակեն այդտեղ մնալ: Երբ մենք հասկանում էինք, որ այդ ճանապարհը չի աշխատում, փորձում էինք այս ճանապարհն ընտրել: Եթե դա նշանակում էր նշաձողի իջեցում, պետք էր գնալ նշաձողի իջեցման»:

«Դուք ամբողջ ճանապարհին պաթոսային հայտարարություններով ու ընդհանրապես ձեր «004 շրջաբերականով» ու Արցախում իշխանություն փոխելու, հետո էլ Հայաստանում իշխանություն փոխելու անհագուրդ ցանկությամբ բերեցիք նրան, ինչ ունենք: Իսկ ԼՂ-ում հիմա մենք ունենք զրո հայ»,- դիմելով ընդդիմությանը՝ եզրափակեց Ռուբինյանը։