«Մետրոպոլիտենը գումար է շորթում․ որոշման մեջ մետրոյի ուղեվարձի թանկացման մասին խոսք չկա»․ Էդգար Ղազարյան

Երևանի ավագանու որոշմամբ փետրվարի 1-ից ավտոմոբիլային տրանսպորտի ուղեվարձի գինը սահմանվել է 150 դրամ: Որոշման մեջ առանձին մետրոյի ուղեվարձի թանկացման մասին խոսք չկա։ Այս մասին հայտնում է հասարակական, քաղաքական գործիչ Էդգար Ղազարյանը: «Երեկ Երևանի ավագանին որոշում է կայացրել հասարակական տրանսպորտը, մասնավորապես, ավտոմոբիլային տրանսպորտը թանկացնելու վերաբերյալ: 100 դրամից որոշել են միանգամից դարձնել 150 դրամ: Բայց այդ որոշման մեջ նշված է, որ դա վերաբերում է միայն ավտոմոբիլային տրանսպորտին, այսինքն, ավտոբուսներին: Ու այդ որոշման մեջ ասվում է, որ եթե մարդն ունի ավտոբուսի տոմս, մետրոյից և տրոլեյբուսից օգտվում է անհատույց: Բայց այնտեղ նշված չէ, որ եթե մարդը չի օգտվում ավտոբուսից, դրա կարիքը չունի, մետրոյի գնի փոփոխություն կա՞, թե ոչ: Այդ փոփոխության մասին խոսք չկա: Այսինքն, ըստ այդ որոշման, մետրոյի գինը շարունակում է մնալ 100 դրամ: Ըստ Երևանի ավագանու որոշման, միայն մետրոյի համար ուղեվարձը պետք է լինի 100 դրամ»,- ասում է Էդգար Ղազարյանը՝ նշելով, որ մետրոպոլիտենը հավելյալ 50 դրամ է կեղեքում՝ 100 դրամի փոխարեն պահանջելով ավտոբուսների համար սահմանված 150 դրամ։ Նա հանցագործության վերաբերյալ հաղորդում է ներկայացրել։