«Անհետացել է Համահայկական ձմեռային երկրորդ խաղերի կրակը». Էդգար Ղազարյան

Հասարակական, քաղաքական գործիչ Էդգար Ղազարյանի ֆեյսբուքյան գրառումը․ «Անհետացել է Համահայկական ձմեռային երկրորդ խաղերի կրակը
2025 թվականի հունվարի 18-ին տեղեկատվություն տարածվեց, որ ՀՀ վարչապետի աշխատակազմի ղեկավար, Համահայկական ձմեռային երկրորդ խաղերի կազմակերպման և անցկացման կառավարական կազմկոմիտեի նախագահ Արայիկ Հարությունյանը, Համահայկական խաղերի համաշխարհային կոմիտեի նախագահ Իշխան Զաքարյանը, պաշտոնատար այլ անձինք ներկա են գտնվել Նորավանքում Համահայկական ձմեռային երկրորդ խաղերի ջահը վառելու միջոցառմանը։ Դեռ պարզ չի, թե ինչու՞ է որոշվել համահայկական խաղերի ջահը վառել Նորավանքում, այլ ոչ թե, օրինակ, էջմիածնի Մայր տաճարում։ Հատկանշական է, որ արարողությանը չի մասնակցել Վայոց ձորի թեմի առաջնորդը։
Դրանից հետո տեղեկատվություն է տարածել, որ Համահայկական խաղերի ջահը հունվարի 19-ին հասել է Վայք քաղաք, որն աշխարհագրորեն Նորավանք-Ջերմուկ ճանապարհի գրեթե կենտրոնական դիրքում է։ Այդ օրվանից հետո Համահայկական խաղերի ջահի, դրա գտնվելու մասին ոչ մի տեղեկատվություն չկա։ Եթե ջահը մեկ օրում Նորավանքից հասել է Վայք, իսկ դրա վերջնական հանգրվանը Ջերմուկն է, որտեղ Համահայկական ձմեռային խաղերի մեկնարկը պետք է տրվի 2025 թվականի փետրվարի 1-ին, ապա ջահը վաղուց պետք է հասած լիներ Ջերմուկ։ Եթե նման կարճ տարածություն էր ընտրված ջահը վերջնական հանգրվան հասցնելու համար, ապա հարց է առաջանում, թե ինչո՞ւ է դրա մեկնարկի արարողությունը սկսել հունվարի 18-ին, այլ ոչ թե, ասենք, հունվարի 31-ին։
Պարզ է մի բան, որ Համահայկական խաղերի գլխավոր խորհրդանիշ հանդիսացող ջահը անհետացել կամ հանգել է։ Սա հերթական դրվագն է այն խայտառակությունների շարքի, որն այդ խաղերի կապակցությամբ իրականացնում են ներկա և նախկին երկու կարկառուն կոռուպցիոներներ՝ Արայիկ Հարությունյանն ու Իշխան Զաքարյանը»։