«Տրանսպորտի թանկացումը՝ հարված աղքատ խավին»․ Սոնա Աղեկյան

«Մայր Հայաստան» դաշինքի անդամ Սոնա Աղեկյանի ֆեյսբուքյան գրառումը․ «Աղքատության և տրանսպորտի թանկացման մարտահրավերը Երևանում
Հայաստանում, որտեղ երկրի յուրաքանչյուր չորրորդ բնակիչը ապրում է աղքատության շեմից ներքև, սոցիալական խնդիրները շարունակում են խորանալ։ Այս պայմաններում քաղաքային իշխանությունների կողմից կայացվող որոշումները հաճախ սրվում են հասարակության մեջ, հատկապես երբ խոսքը վերաբերում է հանրային տրանսպորտի թանկացման նման սոցիալապես զգայուն հարցերին։
Տրանսպորտի թանկացումը՝ հարված աղքատ խավին
Երևանի քաղաքային իշխանությունների որոշումը՝ բարձրացնել տրանսպորտի սակագինը, մեծ հարված է հասարակության սոցիալապես անապահով խավին։ Այն պայմաններում, երբ աշխատավարձերն ու կենսաթոշակները շարունակում են մնալ ցածր, իսկ ապրանքների ու ծառայությունների գները տարեցտարի բարձրանում են, տրանսպորտի թանկացումը հատկապես ծանր ազդեցություն ունի նրանց վրա, ովքեր ամեն օր ստիպված են օգտվել հանրային տրանսպորտից՝ աշխատանքի հասնելու կամ առօրյա կարիքները հոգալու համար։
Սովորական քաղաքացու համար, ով միջինում օրական 2-4 երթևեկություն է կատարում, սակագնի ավելացումը տարեկան մեծ գումար է կազմում։ Դա հատկապես սրվում է նրանց համար, ովքեր ընտանիքի մի քանի անդամների հետ միասին կախված են հանրային տրանսպորտից։
Քաղաքային 2,5 միավորանոց իշխանության դերը
Երևանի քաղաքապետարանը՝ արժանիորեն ձեռք է բերել քաղաքացիների կարիքները հաշվի չառնելու մեջ, կարծես անտեսում է այս խնդրի սոցիալական հետևանքները։ Թանկացումները պատրվակվում են տրանսպորտային համակարգի բարելավմամբ, սակայն քաղաքացիները չեն տեսնում խոստացված փոփոխությունները, ավելին տրանսպորտը լիքն է, կանգառներում սպասում են ժամերով, չվացուցակներ չկան, QR թերթիկները էլ ավելորդ հոգս դարձան, շարքը կարելի է շարունակել։
«Կառուցելու ենք նոր ճանապարհներ, նոր ավտոբուսներ ենք գնելու» խոստումները չեն արդարացնում հանրային դժգոհությունը, քանի դեռ աղքատությունը և սոցիալական անհավասարությունը մնում են հիմնական խնդիրները։
Քաղաքացիների վստահությունը դեպի իշխանություն նվազում է, երբ նրանք տեսնում են, որ որոշումները կայացվում են առանց հասարակական լայն քննարկումների և առանց սոցիալական ազդեցության հստակ վերլուծության։
Տրանսպորտի թանկացման հետևանքները
Աղքատության խորացում
Տրանսպորտի թանկացումը կնվազեցնի մարդկանց հասանելիությունը աշխատանքի հնարավորություններին և սոցիալական ծառայություններին։ Շատ քաղաքացիներ ստիպված կլինեն կրճատել իրենց երթևեկությունները կամ օգտվել ավելի քիչ անվտանգ և որակյալ փոխադրամիջոցներից։
Տնտեսական բեռի ավելացում
Հանրային տրանսպորտի թանկացումը կբերի նաև ապրանքների գների բարձրացման, քանի որ բեռնափոխադրումների ծախսերը նույնպես կավելանան։
Երևանի քաղաքային իշխանությունները պետք է հաշվի առնեն, որ տրանսպորտի թանկացումը միայն տնտեսական որոշում չէ. այն ունի սոցիալական խորը ազդեցություն։ Աղքատության բարձր մակարդակի պայմաններում ցանկացած նման որոշում պետք է վերլուծվի սոցիալական հետևանքների տեսանկյունից։ Հանրային տրանսպորտը միայն փոխադրամիջոց չէ. այն քաղաքացիների համար հասանելիության, աշխատանքի, կրթության և սոցիալական ակտիվության հնարավորություն է։
Պետք է լուծումներ գտնել, որոնք ոչ միայն չեն վնասի հասարակությանը, այլև կնպաստեն նրա բարօրությանը, գործող իշխանության պայմաններում այս ամենին հասնելու համար անհրաժեշտ է բոյկոտ։
«Մայր Հայաստան»-ը յուրաքանչյուր քաղաքացու աջակցության կարիքն ունի, որպեսզի միասնական ջանքերով կարողանանք պայքարել տրանսպորտի թանկացման դեմ»։