Ֆրանսիայի դիվանագիտական առաքելությունը 12 տարվա ընդմիջումից հետո ժամանել է Դամասկոս

Ֆրանսիական պատվիրակությունը Սիրիայի հարցով հատուկ բանագնաց Ժան-Ֆրանսուա Գիյոմի գլխավորությամբ դեկտեմբերի 17-ին ժամանել է Դամասկոս և այցելել դեսպանատան շենքերը, որոնք փակ են 2012 թվականից ի վեր։ Այս մասին հայտնում է AFP գործակալությունը։
«Ֆրանսիան պատրաստվում է սիրիացիների կողքին լինել անցումային շրջանում»,- լրագրողներին ասել է Գիյոմը։
Ֆրանսիական պատվիրակությունը հայտարարել է, որ մտադիր է «շփումներ հաստատել Սիրիայի դե ֆակտո իշխանությունների հետ»։
Ավելի վաղ հաղորդվել էր, որ Փարիզը Դամասկոս է ուղարկում չորս դիվանագետի։
Ֆրանսիայի արտգործնախարարի պաշտոնակատար Ժան-Նոել Բարոյի խոսքով՝ դիվանագետների նպատակը «Սիրիայում ֆրանսիական ազդեցությունը վերականգնելը, նոր իշխանությունների հետ նախնական կապեր հաստատելն ու բնակչության հումանիտար կարիքները գնահատելն է»։