«Մահափորձի «սցենարը» կարծես գրված լինի Հոլիվուդում»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Տրամպի դեմ մահափորձի «սցենարը» կարծես գրված լինի Հոլիվուդում
Համենայն դեպս, շատ ուշագրավ է, որ նրա դեմ երկրորդ մահափորձի համար կասկածվում է մարդ, որը վերջին շրջանում աչքի է ընկել որպես Ուկրաինա ՌԴ ներխուժման ջատագով, աջակից:
Դեմոկրատները Տրամպին «թիրախավորում» են այն համատեքստով, որ նա «ենթակա» է լինելու Պուտինին: Օրինակ, վերջին դեբատի ժամանակ Կամալա Հարիսը հայտարարել էր, թե, եթե նախագահ լիներ Տրամպը, ապա Պուտինն արդեն նստած կլիներ Կիևում:
Ինչ խոսք, կասկածից վեր է, որ դա ընդամենը նախընտրական քարոզչական հնարք է, ոչ ավելի: Բայց, ի վերջո ընտրության ելքերը որոշվում են այդպիսի հնարքների արդյունավետությամբ:
Եվ ահա, դեբատային այդ դրվագից հետո, Տրամպի հանդեպ երկրորդ մահափորձ, որի համար կասկածվում, մեղադրվում է Ուկրաինա Պուտինի ներխուժման աջակիցը: Այլ կերպ ասած, Տրամպին թիրախավորում է Պուտինի աջակիցը, մինչդեռ Հարիսի պնդման տրամաբանությունը պետք է ենթադրեր հակառակը:
Ընդգծեմ, դիտարկում եմ հանգամանքների հարաբերակցությունը, այլ ոչ թե պնդում, թե խոսքը բեմադրված, իրապես սցենարով մահափորձի մասին է:
Բայց, բոլոր դեպքերում «սյուժեն» ստացվում է հետաքրքիր, գումարվելով Պուտինի այն հայտարարությանը, որ հնչել էր իհարկե դեռևս դեբատից առաջ, թե Ռուսաստանը շահեկան է համարում Հարիսի հաղթանակը: Ավելի վաղ էլ Պուտինը հայտարարել էր, որ Բայդենի հաղթանակն է իրենց համար շահեկան, երբ թեկնածուն դեռ Բայդենն էր:
Ինչ խոսք, մեծագույն հավանականությամբ Պուտինի այդ խոսքերը այլ բան չեն, քան որոշակի տրոլլինգ, սակայն բոլոր դեպքերում դրանց ընկալումները ամերիկյան հանրության շրջանում կարող են լինել տարբեր: Հատկապես, որ երկու թեկնածուներն էլ կարծես թե բավականին հաճույքով են օգտագործում Պուտինի գործոնը իրենց նախընտրական ռազմավարությունում:
Խոշոր առումով, իհարկե, ԱՄՆ-ում նախագահ «ընտրում» է այդ երկրի խորքային պետությունը, իսկ այն կարծես թե առայժմ չունի ընտրություն, համենայն դեպս ընտրություն Հարիսի ու Տրամպի միջև:
Առայժմ կարծես թե խնդիրը եղել է ընտրական պրոցեսում՝ ամերիկյան տնտեսա-քաղաքական, հասարակական-մշակութային մեխանիզմի ողնաշարային հանգամանքի՝ «մրցակցայնությունն» ապահովելը, քանի որ Բայդենի մնալու պարագայում Տրամպի հաղթանակը իհարկե բացարձակ երաշխավորված էր»։