«Սա վկայում է շատ ծանր բաների մասին». Արա Պողոսյան

Քաղաքագետ Արա Պողոսյանի ֆեյսբուքյան գրառումը․ «Հայաստանում Իրանի դեսպան Մեհդի Սոբհանին հայտարարել է, որ ցանկացած համագործակցություն Իրանի կողմից Հայաստանի հետ, այդ թվում և անվտանգության ոլորտում, կախված է հենց Հայաստանի կառավարությունից։
Այնուհետև դեսպանը նշել է. «Մենք պատրաստակամություն ենք հայտնել, համագործակցել փոխադարձության սկզբունքով։
Հայաստանի հետ համագործակցությունը հնարավոր է ցանկացած մակարդակում, բայց դա պետք է լինի փոխադարձ պայմանավորվածությունների հիմքով»:
Սա վկայում է ծանր, շատ ծանր բաների մասին, որոնցից մեկն այն է, որ Հայաստանը հնարավորություն չունի համագործակցելու Իրանի հետ այնպես, ինչպես պահանջում է Հայաստանի շահը։ Իսկ այդ հնարավորությունը կորցրել են այս իշխանությունները՝ զիջելով արևմտյան գործընկերներին ու հատկապես ԱՄՆ-ին։ Ընդ որում, եթե հաշվի առնենք Ֆրանսիայի նախագահի հայտարարությունը, որ թեպետ Իրանի հետ Ֆրանսիան ունի լրջագույն հակասություններ, սակայն Հայաստանի հարցում Ֆրանսիայի և Իրանի շահերը համընկնում են, ապա կստացվի, որ հայ-իրանական հարաբերությունների դեմ գլխավորապես աշխատում են ԱՄՆ-ն, ԵՄ-ն և Իսրայելը։
Այլապես ես կարծում եմ, որ որևէ հիմք չկա՝ Հայաստան-Իրան-Հնդկաստան եռակողմ դաշինքի չձևավորման համար, որը կարող էր որոշակիորեն հավասարակշռել տարածաշրջանում Հայաստանի և Ադրբեջանի միջև խախտված ռազմա-քաղաքական պարիտետը (բալանս)»։