«Ազդարարված է Հայաստանի հանքարդյունաբերության ոլորտում մեծ վերադասավորման մասին». Ա. Բաբաջանյան

ԱԺ նախկին պատգամավոր Արման Բաբաջանյանը գրում է. «Փաստացի, ազդարարված է Հայաստանի հանքարդյունաբերության ոլորտում մեծ վերադասավորման մասին, որը լայն իմաստով վերադասավորում է Հայաստանի տնտեսության մասշտաբով, եթե իհարկե իրականություն է դառնում միլիարդավոր դոլարների ներդրումային մտադրությունների գործընթացը: Հայաստանի տնտեսության ծավալները հաշվի առնելով, անգամ մի քանի հարյուր միլիոն դոլարը բավարար է ուժերի հարաբերակցության էական փոփոխության համար, ուր մնաց մի քանի միլիարդ դոլարը: Այստեղ իհարկե կա ուշադրության արժանի երկու ասպեկտ: Նախ, հանքարդյունաբերության գիգանտի՝ Զանգեզուրի պղնձամոլիբդենային կոմբինատի «բազայի» վրա տեղի ունենալիք վերադասավորումը ունենալու է ներքաղաքական ազդեցություն: Հայաստանի խոշորագույն հարկատու Զանգեզուրի կոմբինատը ըստ էության «համակարգային» էր Հայաստանի նախորդ իշխանության համար: Այդպիսով, բաժնետերերի փոփոխությունը բերում է նախկին համակարգի համար ներքին սնուցման առանցքային աղբյուրի «սակավաջրության», ինչը իր ազդեցությունը կունենա ներքաղաքական կյանքի «ռեսուրսային ապահովման» տեսանկյունից:
Սակայն, ավելի խոշոր իմաստով կա մեկ այլ ասպեկտ: Ամիսներ առաջ Հայաստանին առաջիկա հինգ տարիների համար գրեթե 3 միլիարդ եվրոյի հասնող ֆինանսական աջակցության մտադրության մասին հայտարարեց Եվրամիությունը: Դա ահռելի թիվ է Հայաստանի տնտեսության համար, դրանից բխող նաև քաղաքական ազդեցությամբ, որ կարող է թողնել տնտեսական ուժերի հարաբերակցության փոփոխությունը: Արդյո՞ք ռուսական ընկերությունը, ռուսաստանցի միլիարդատեր Տրոցենկոն ոչ առանց Մոսկվայի քաղաքական որոշման ստանձնում են Եվրոմիության մտադրություններին ներդրումային ռուսական մտադրություններով «հակազդելու» հանձնառություն: Եթե գործ ունենք այդպիսի իրավիճակի հետ, ապա դա թերևս բավականին նախընտրելի վիճակ է՝ տնտեսական մրցակցություն Հայաստանի համար: Այստեղ խնդիր կարող է առաջանալ այն պարագայում, երբ Ռուսաստանը փորձի օգտագործել իր ունեցած քաղաքական կամ ռազմա-քաղաքական լծակները՝ եվրոպական տնտեսական, ներդրումային մտադրությունները չեզոքացնելու համար, Տրոցենկոյի ներդրումները այդ պայմաններում դիտարկելով ընդամենը Հայաստանի մխիթարություն: Երևանի համար շատ կարևոր է ռուսական ներդրումային մտադրությունների իրականացման ուղղությամբ աշխատանքին զուգահեռ, ոչ պակաս ջանք ու եռանդ գործադրել Եվրոմիության բարձրաձայնած ֆինանսական մտադրությունները իրականություն դարձնելու և տնտեսական մրցակցության այդ միջավայրը պահելու համար»: