Երևան`   +11 °C
Այսօր`   Երեքշաբթի, 17 նոյեմբերի, 2026 թ.

«ՀՀ իշխանությունը պետք է մտածի գազային այդ խայտառակ համաձայնագիրը վերանայելու մասին». Արման Բաբաջանյան

329
Չորեքշաբթի, 22 ապրիլի, 2020 թ., 15:00
«ՀՀ իշխանությունը պետք է մտածի գազային այդ խայտառակ համաձայնագիրը վերանայելու մասին». Արման Բաբաջանյան

ԱԺ ապրիլի 22-ի նիստում պատգամավոր Արման Բաբաջանյանն անդրադարձավ այս օրերին քննարկման թեժ թեմա դարձաձ գազի գնին: Ըստ նրա, երբ ամբողջ աշխարհում հակառեկորդ է սահմանում նավթի գինը, ՀՀ ռազմավարական գործընկեր Ռուսաստանը չի հրաժարվում գազի գինը թանկացնելու որոշումից:

«Ռուսաստանը ճգնաժամային պայմաններում ոչ միայն չի աջակցում իր ռազմավարական գործընկերոջն ու ԵԱՏՄ անդամ Հայաստանին, այլև իր այս որոշմամբ հավելյալ ռիսկեր է ստեղծում մեր տնտեսության համար: Դա արվում է չափազանց վատ տոնով և հիմնավորումներով»,- գնահատեց պատգամավորը:
«ՀՀ-ին մատակարարվող գազի գինը ՌԴ կողմից որպես մահակ օգտագործելու իրողությունն արդյունք է նախկին իշխանությունների կողմից կնքված գազային խայտառակ համաձայնագրի և ՀՀ ներքին գազաբաշխման համակարգն ամբողջությամբ «Գազպրոմին» հանձնելու հանցավոր որոշման»,- ասաց պատգամավորը:
Նա նկատեց, որ թեպետ այդ համաձայնագիրը չեղարկելը բարդ է՝ կապված միջպետական հարաբերությունների բազմաթիվ խութային ասպեկտների հետ, սակայն ՀՀ ԱԺ-ն ու իշխանությունը պետք է մտածեն այն վերանայելու մասին՝ դրան անդրադառնալով ոչ միայն ՀՀ-ՌԴ երկկողմ, այլև ԵԱՏՄ անդամակցության համատեքստում:
«Մենք շարունակում ենք անդամակցել մի տնտեսական միության, որը գլխավոր շահառուն՝ Ռուսաստանը, նաև տնտեսական հարցերում մեր նկատմամբ դրսևորում է ամենևին ոչ գործընկերային և ոչ դաշնակցային մոտեցում»,-ամփոփեց Արման Բաբաջանյանը: