Էկվադորում մահացածների դիերը մնում են փողոցներում և տներում (18+)

Էկվադորում կորոնավիրուսով պայմանավորված իրավիճակը դուրս է գալիս վերահսկողությունից: Գուայակիլ քաղաքում, որը դարձել է երկրի վարակի էպիկենտրոնը, ոստիկանությունը չի հասցնում մահացածների դիերը հավաքել փողոցներից ու տներից, գրում է Independent-ը: Փողոցներում տիրում է գարշահոտություն՝ նեխող դիերի պատճառով:

Միայն տներում մահացածների թիվն անցել է 770-ը: Բուժհաստատություններից Ոստիկանությունը վերցրել է ևս 631 մարմին:

Քաղաքում թաղման ծառայություններն այլևս ի վիճակի չեն իրականացնել իրենց գործառույթները մահերի կտրուկ աճի պատճառով: Քաղաքի ղեկավարությունն սկսել է բաժանել ստվարաթղթե դագաղներ:

Ըստ տարբեր աղբյուրների՝ այս երկրում, ընդհանուր առմամբ, կա վարակված շուրջ 7500 մարդ: Սակայն երկրի նախագահ Լենին Մորենոն հայտարարել է, որ իրականում վարակվածների թիվն ավելի մեծ է, մինչդեռ թեստեր անում են ոչ մեծ ծավալներով:

Ռուս գիտնականներն էլ նշում են, որ հույսը, թե վարակը կնահանջի տաք եղանակներին զուգընթաց, անհիմն է՝ ապացույց՝ շոգ կլիմայով աչքի ընկնող Էկվադորում տիրող իրավիճակը: