Ինչո՞ւ չեն թեստավորվել ՀՀ վարչապետի հետ շփված լրագրողները

«Թոքաբորբով հիվանդացածները միջին տարիքի անձինք են, նրանց առողջական վիճակը բավարար է գնահատված: Թեթև են տանում թոքաբորբը, ստանում են սիմպտոմատիկ բուժում, որն արդյունավետ է լինելու». մարտի 17-ին լրագրողների հետ հանդիպմանն ասաց Առողջապահության նախարարի տեղակալ Լենա Նանուշյանը: Նա նշեց, որ բոլոր երկրները, այդ թվում Հայաստանը, ձեռնարկում են միջոցառումներ՝ հիվանդության գրանցման դեպքերի քանակը նվազեցնելու և վիրուսի տարածման հակազդումն արդյունավետ կազմակերպելու համար:
Ըստ Լ. Նանուշյանի՝ մշակվել են ուղեցույցներ, որոնցով բացատրվում է, թե ինչ տիպի ախտահանման աշխատանքներ պետք է կատարվեն տարբեր օբյեկտներում, այդ թվում՝ հասարակական տրանսպորտում:
Փոխնախարարը նշեց, որ աշխատում են նոր թեստեր ձեռք բերելու ուղղությամբ:
Հարցին, թե ինչո՞ւ չեն թեստավորվել ՀՀ վարչապետի հետ շփված լրագրողները, պատասխանեց վարչապետի մամուլի քարտուղար Մանե Գևորգյանը: Նա նկատեց, որ թեստավորման առաջարկ եղել է, բոլոր լրագրողներն էլ հրաժարվել են:
Փոխնախարար Լ. Նանուշյանը հիշեցրեց, որ թեստավորում են այն անձանց, ում մոտ կան կլինիկակակն ախտանիշներ, ովքեր ժամանել են համաճարակային առումով լարված երկրից, կամ շփում են ունեցել լաբորատոր հաստատված դեպքի հետ: