«2016 թվականի ՇՄԱԳ-ը և նախագիծը բավարար չեն ապահով հանք շահագործելու համար». փորձագետներ

Ամուլսարի հանքի շահագործման վերաբերյալ տեսակոնֆերանսի ժամանակ ՀՀ շրջակա միջավայրի նախարար Էրիկ Գրիգորյանը փորձագիտական եզրակացություն տված ԷԼԱՐԴ-ի փորձագետներից հետաքրրքրվեց՝ արդյոք գործող ՇՄԱԳ-ով բավարար չէ՞ աշխատանքներ իրականացնելը և արդյոք 2016 թվականի ՇՄԱԳ-ը և նախագիծն ուսումնասիրելով՝ ԷԼԱՐԴ-ը համարո՞ւմ է, որ դա բավարար է։

Փորձագետները նշեցին հետևյալը. «Մեր թիմը և փորձագետներն այն կարծիքին են, որ 2016թ–ին կատարված փորձաքննություններն ու ՇՄԱԳ–ը բավարար չեն հանքն ապահով շահագործելու համար։ Եվ սա հստակ փաստաթղթավորված է մեր գնահատման եզրակացության մեջ»:

Անդրադառնալով հանք շահագործողի առաջարկած մեղմման միջոցներին՝ փորձագետները նշեցին, որ դրանք ևս արժանահավատ չեն համարում, քանի որ արվել են 5 տարի առաջ ու այսօր արդեն թերի են։

«էԼԱՐԴ»-ի ներկայացուցիչները նշեցին, որ իրենք պատրաստել են հանգամանալից և անաչառ եզրակացություն և պատրաստ են պաշտպանել եզրակացության ցանկացած դրույթ: