Երևան`   +6 °C
Այսօր`   Երեքշաբթի, 17 նոյեմբերի, 2026 թ.

«Վեոլիա Ջուր»-ը մտադիր է սակագինը նվազեցնելու հայտով դիմել ՀԾԿՀ

520
Երեքշաբթի, 06 օգոստոսի, 2019 թ., 18:30
«Վեոլիա Ջուր»-ը մտադիր է սակագինը նվազեցնելու հայտով դիմել ՀԾԿՀ

ՀՀ ջրամատակարար «Վեոլիա Ջուր» ՓԲԸ-ն մտադիր է ջրի սակագինը նվազեցնելու հայտով դիմել ՀՀ հանրային ծառայությունները կարգավորող հանձնաժողովին: Ինչպես նշված է ընկերության հայտարարության մեջ, այս տարվա հուլիսի 25-ին ՀՀ կառավարությունը՝ ի դեմս Ջրային կոմիտեի (Վարձատու), «Վեոլիա Ջուր» ՓԲԸ-ն (Վարձակալ) և «Վեոլիա Օ-Կոմպանի Ժեներալ Դեզ Օ» ընկերությունը կնքել են համատեղ համաձայնագիր, որով պարտավորվել են փոփոխություններ կատարել գործող կարգավորումներում, այդ թվում՝ նաև սակագներում:

Ըստ այդմ՝ առաջարկվում է մանրածախ խմելու ջրի մատակարարման ծառայության մատուցման սակագինը յուրաքանչյուր 1 խմ դիմաց սահմանել 154.536 դրամ (ներառյալ ԱԱՀ)՝ գործող 162.702 դրամի (ներառյալ ԱԱՀ) փոխարեն:

Մանրածախ ջրահեռացման (կեղտաջրերի մաքրման) ծառայության մատուցման սակագինը յուրաքանչյուր 1 խմ դիմաց սահմանել 27.271 դրամ (ներառյալ ԱԱՀ)՝ գործող 28.712 դրամի (ներառյալ ԱԱՀ) փոխարեն:

Ընկերությունն առաջարկում է նաև մեծածախ խմելու ջրի մատակարարման ծառայության մատուցման սակագինը յուրաքանչյուր 1 խմ դիմաց սահմանել 36.361 դրամ (ներառյալ ԱԱՀ) դրամ՝ գործող 38.282 դրամի (ներառյալ ԱԱՀ) փոխարեն:

Մեծածախ ջրահեռացման ծառայության մատուցման սակագինը յուրաքանչյուր 1 խմ դիմաց սահմանել 18.181 դրամ (ներառյալ ԱԱՀ)՝ 19.141 դրամի (ներառյալ ԱԱՀ) փոխարեն:

Նշենք, որ ՀՀ հանրային ծառայությունները կարգավորող հանձնաժողովը ըստ կարգի՝ որոշում կայացնելու համար ունի 90-օրյա ժամկետ: