Օզբիլիսը մոտ է Հայաստան տեղափոխվելուն

Հայաստանի ազգային հավաքականի կիսապաշտպան Արաս Օզբիլիսը մոտ է Հայաստան վերադառնալուն և կարիերան Երևանի «Արարատ»-ում շարունակելուն, հայտնում է Sport24-ը:

Նշենք, որ 29-ամյա ֆուտբոլիստը 2016 թվականից համարվում է «Բեշիքթաշ»-ի ֆուտբոլիստ: Թուրքական ակումբ տեղափոխվելուց անմիջապես հետո նա վարձակալությամբ հանդես է եկել «Ռայո Վալյեկանո»-ում, որտեղ, արդյունքում, ընդամենը 3 հանդիպման է մասնակցել: 2018-ի փետրվարից հունիս նա վարձակալությամբ հանդես է եկել «Շերիֆ»-ի կազմում, որտեղ 4 խաղի է մասնակցել:

Անցած մրցաշրջանն Օզբիլիսն սկսել է «Վիլլեմ II»-ի կազմում: Ապրիլին նա հրաժարվել է փոխարինման դուրս գալ Հոլանդիայի առաջնության 27-րդ տուրի՝ «Ֆորտունա»-ի դեմ խաղում (3:2), ինչից հետո հոլանդական ակումբը խզել է նրա հետ վարձակալական պայմանագիրը: «Վիլլեմ II»-ի կազմում նա անցկացրել է 17 խաղ՝ դառնալով 2 գոլի և 2 գոլային փոխանցման հեղինակ:

Նշենք նաև, որ Օզբիլիսի պայմանագիրը «Բեշիքթաշ»-ի հետ նախատեսված է մինչև 2021 թվականի ամառը։ Թուրքական ակումբի կազմում նա ընդհանուր առմամբ 5 հանդիպման է մասնակցել և դարձել 1 գոլի հեղինակ: