Կիմ Չեն Ինը Թրամփի հետ հանդիպման է ուղևորվել զրահապատ գնացքով

Հյուսիսային Կորեայի առաջնորդ Կիմ Չեն Ինը հատուկ զրահապատ գնացքով ուղևորվել է Վիետնամի մայրաքաղաք Հանոյ, որտեղ փետրվարի 27-28-ը տեղի կունենա իր և ԱՄՆ նախագահ Դոնալդ Թրամփի հանդիպումը:

Yonhap-ի հաղորդմամբ՝ գնացքը շարժվել է շաբաթ օրը ցերեկը, Կիմ Չեն Ինին ուղեկցել են բարձրաստիճան պաշտոնյաներն ու նրա քույրը՝ Կիմ Յո Չենը:

Նշվում է, որ գնացքը պետք է հաղթահարի 4,5 հազար կմ, որի համար 2 օր կպահանջվի:

Զրահապատ գնացքը Հյուսիսային Կորեայի առաջնորդների ավանդական տրանսպորտային միջոցն է. դրա միջոցով պաշտոնական այցեր են կատարել նաև Կիմ Չեն Ինի պապն ու հայրը՝ Կիմ Իր Սենն ու Կիմ Չեն Իրը:

Նշենք, որ Թրամփ-Կիմ Չեն Ին առաջին պատմական հանդիպումը տեղի է ունեցել 2018-ի հունիսին Սինգապուրում, որի ընթացքում Կիմ Չեն Ինը հաստատել է ապամիջուկայնացման մտադրությունը, իսկ Թրամփն անվտանգության երաշխիքներ տրամադրել: