Հյուսիսային Կորեան ազատ է արձակել ձերբակալված 3 ամերիկացիներին

Հյուսիսային Կորեայում ազատ են արձակվել ԱՄՆ-ի 3 քաղաքացիները, ովքեր պատիժ էին կրում արևմտյան հատուկ ծառայությունների օգտին լրտեսելու համար: Նրանք ԱՄՆ պետքարտուղար Մայք Փոմփեոյի հետ մեկնել են հայրենիք:

Ազատ են արձակվել 65-ամյա Կիմ Դոն Չուլը (ձերբակալվել էր 2015թ. հոկտեմբերին), Թոնի Քիմը (ձերբակալվել էր 2017թ. ապրիլին) և Կիմ Հաք Սոնը (ձերբակալվել էր 2017թ. մայիսին):

Բոլոր նրանք Հարավային Կորեայից են, սակայն ունեն ամերիկյան քաղաքացիություն: Ազատ արձակվածները շնորհակալություն են հայտնել ԱՄՆ նախագահ Դոնալդ Թրամփին և Աստծուն.

«Մենք ցանկանում ենք մեր խորին երախտագիտությունը հայտնել Միացյալ Նահանգների ղեկավարությանը, նախագահ Թրամփին, պետքարտուղար Փոմփեոյին և ամերիկացիներին, որ մեզ տուն վերադարձրեցին: Մենք շնորհակալ ենք Աստծուն, մեր ընտանիքներին և մեր ընկերներին, ովքեր աղոթում էին մեր վերադարձի համար»:

Ավելի վաղ Թրամփը Twitter-ի իր էջում գրել էր, որ Փոմփեոն գտնվում է Հյուսիսային Կորեայում և հանդիպել է ձերբակալվածների, ինչպես նաև Հյուսիսային Կորեայի առաջնորդ Կիմ Չեն Ինի հետ: