«Շնորհակալություն երկրորդ կյանքի համար». հայ վիրաբույժները փրկել են դեմքի պայթյունային վիրավորումով հոսպիտալացված պացիենտի կյանքը

«Շնորհակալություն երկրորդ կյանքի համար»,- այս խոսքերով է Հերացի ԲԿ Դիմածնոտային վիրաբուժության և ԼՕՌ կլինիկայի պացիենտը վիրահատության 12-րդ օրն իր երախտագիտությունը հայտնել վիրաբույժներին:
Պացիենտը դիմել է N1 հիվանդանոց 2018 թվականի հունվարի 20-ին դեմքի և ձախ ձեռքի պայթյունային վիրավորումից հետո՝ ծայրահեղ ծանր վիճակում, դեմքի ծավալուն թափանցող պատռված վերքերով, վերին ծնոտի բազմաբեկորային բազմաթիվ ջարդվածքներով՝ Լե-Ֆոր III, Լե-Ֆոր-II տեսակների, ակնակապիճի ստորին պատի կոտրվածքով, ստորին ծնոտի ձախ մասի կոտրվածքով, բազմաթիվ տեղահանված ոսկրերով ու կոտրված ատամներով, լորձաթաղանթի վնասվածքով և այլն:
Դիմածնոտային վիրաբույժների և անեսթեզիոլոգ-ռեանիմատոլոգների թիմը իրականացրել է 7 ժամանոց վիրահատություն՝ հիվանդի դիմային գանգը վերականգելու նպատակով: Բազմակի ոսկրային բեկորները վերատեղադրվել են և ամրացվել տիտանի թիթեղներով, աջ ակնակապիճի ստորին հատվածը վերականգնվել է տիտանի մեմբրանի միջոցով: Բազմաթիվ պատռված վերքերը վերականգնվել են կոսմետիկ առավելագույն արդյունքով:

Պացիենտը նման վնասվածքներ էր ստացել գազի պայթյունի հետևանքով: