Իսրայելի Կենտրոնական ընտրական հանձնաժողովը հաստատել է Քնեսեթի ընտրությունների արդյունքները

Իսրայելի Կենտրոնական ընտրական հանձնաժողովը հաստատել է հոկտեմբերի 27-ին կայացած Քնեսեթի (միապալատ խորհրդարանի) ընտրությունների արդյունքները։ Այս մասին հայտնել է N12 հեռուստաալիքը։

Հեռուստաալիքի տվյալներով՝ ընտրությունների արդյունքների հաստատմանը կողմ է քվեարկել ԿԸՀ ղեկավարության երեք անդամ, երկուսը ձեռնպահ են մնացել։ «Կուսակցություններից ստացված բոլոր դիմումները դիտարկվել են, խախտումներ, որոնք կարող էին ազդել ընտրությունների ազնվության վրա, չեն հայտնաբերվել»,- հեռուստաալիքը մեջբերում է հանձնաժողովի հայտարարությունը:

Այսօր ԿԸՀ-ն ընտրությունների արդյունքները պաշտոնապես կներկայացնի Իսրայելի նախագահ Իցհակ Հերցոգին։

Խորհրդարանական ընտրությունների արդյունքում քաղաքական ուժերից ոչ մեկը վճռորոշ առավելություն չի ստացել։ Քվեաթերթիկների 100 տոկոսի հաշվարկից հետո առաջին տեղը զբաղեցրել է գործող վարչապետ Բենիամին Նեթանյահուի գլխավորած աջակողմյան «Լիկուդ» կուսակցությունը՝ 120 տեղանոց Քնեսեթում ստանալով 27 մանդատ։ Երկրորդ տեղում է հայտնվել առաջատար ընդդիմադիր «Յաշար» կուսակցությունը՝ Գադի Այզենկոտի գլխավորությամբ, որը ստացել է 21 մանդատ։