ԵՊՀ պրոֆեսորն ի՞նչ կապ ունի․ փաստաբանը բացահայտում է կաշառքի գործի զավեշտը

«Հրապարակը»-ը գրում է․ Հակակոռուպցիոն կոմիտեն այսօր հաղորդել է, որ ԵՊՀ ամբիոնի վարիչի կողմից կաշառք ստանալու գործով նախաքննության ավարտի և գործը մեղադրական եզրակացությամբ դատարան ուղարկելու մասին: Ինչպես հայտնի է, խոսքը Երևանի պետական համալսարանի պատմության ֆակուլտետի Հայոց պատմության ամբիոնի վարիչ, պատմական գիտությունների դոկտոր, պրոֆեսոր Էդիկ Մինասյանի մասին է։ Այս պահի դրությամբ պարոն Մինասյանը շարունակում է զբաղեցնել նույն պաշտոնը, սակայն նրա լիազորությունները դադարեցված են՝ տնային կալանքի տակ գտնվելու պատճառով․․․

էդիկ Մինասյանը ԱԺ ընդդիմադիր «Հայաստան» խմբակցության պատգամավոր, ՀՅԴ անդամ Արծվիկ Մինասյանի եղբայրն է։ Մամուլում արդեն իսկ հնչում են տեսակետներ գործի հնարավոր քաղաքականացվածության կամ միտումնավորության վերաբերյալ։

Զրուցել ենք է պրոֆեսոր Մինասյանի փաստաբան Բենիկ Գալստյանի հետ։ Պարզեց, որ բուհ ընդունվող սուբյեկտը, որի մասին խոսվում է ձայնագրության մեջ, երբևիցե պրոֆեսոր Մինասյանի բուհ, որը ԵՊՀ-ն է, չի դիմել, ոչ էլ նպատակ է ունեցել դիմելու: Նա այլ բուհում է սովորում և հանձնել է մաթեմատիկայի քննություն:
«Ըստ քննչական մարմնի, անձը դիմել է իր թոռանն իստիտուտ ընդունելու համար: ԵՊՀ- ի հետ այդ երեխան առնչություն չունի: Իհարկե, Էդիկ Մինասյանը բավականին լուրջ հեղինակություն ունի, բայց ինչպե՞ս նա կարող էր ազդել մաթեմատիակական բուհի քննությունների վրա, ի՞նչ պետք է աներ, այ դա չեմ հասկանում», - ասում է փաստաբանը: Նա ենթադրում է, որ տվյալ «պապիկը», ում ձայնը լսվում է ձայնագրության մեջ, գլուխ է գովում, որ գիտի էդիկ Մինասյանին: «Մինասյանի կողմից որևէ բան տալ վերցնել, խնդրել, առաջարկել, ստիպել ընդունել, գոյություն չունի: Զավեշտն այն է նաեւ, որ քննչական մարմնի նախնական վարկածով, խոսքը վերաբերում էր 2022 թվականին տեղի ունեցած դեպքին: Ըստ միջանկյալ վարկածի, այն տեղի է ունեցել 2024 թվականին: Ոնց որ երկու անձ իրար հետ խոսեն, զանգեմ ձեզ, ասեմ՝ բա չիմացա՞ք՝ Մինասյանի գոծով մտանք քննիչի մոտ, ասեցի՝ ի՞նչ կլինի, գործը կարճես, քննիչն էլ ասեց, 10000 դոլար տվեք, կարճեմ, ու վերջ խոսակցությանը: Դրանից հետո ինձ կանչեն հարցաքննության ու քննիչին էլ կալանավորեն, ասեն՝ դու կաշառք ես ստացել: Էությունը սա է: Էդիկ Մինասյանը, բնականաբար, մեղադրանքը չի ընդունում, քանի որ այն իրականության հետ որևէ աղերս, կամ առնչություն չունի», - ասում է Բենիկ Գալստյանը և հավելում, որ անձը, որի ձայնը լսվում է հրապարակած ձայնագրության մեջ մեկ այլ քրեական գործով անցնում է որպես մեղադրյալ, և այդ գործը վերաբերում է ընտրակաշառքին, բայց չգիտես ինչու, նրա նկատմամբ կալանքը որպես խափանման միջոց չի կիրառվել»։ Փաստաբանը համոզված է, որ այս գործով նրա պաշտպանյալն արդարացվելու է: «Մենք այս հրապարակման առիթով բողոք ենք ներկայացնելու, օգտագործելով իրավական գործիքակազմը ու ասելու ենք՝ ինչպես որ սիրուն հրապարակումն արել եք, նույն ձեւով սիրուն հերքում հրապարակեք: Պարոն Մինասյանը 80-ականներից ԵՊՀ-ում է, հայոց պատմության ոլորտում, մեղմ ասած՝ վերջին անձը չի, եւ սա ռեպուտացիոն խնդիր է, որից մարդն իրեն վատ է զգում: Մեղադրանքն այս նվաստացուցիչ է: Այլ դեպքում ես ուղղակի ժպիտով կվերաբերվեի այդ դեպքին, որովհետեւ այստեղ մենք «դեպք» ընդհանրապես չունենք»:

Պարտաստվո՞ւմ եք տնային կալանքի որոշումը բողոքարկել՝ հարցրեցինք փաստաբանին, նա պատասխանեց․ «Մենք փորձում էինք դա անել, բայց որոշումից մեկ օր անց գործը մեղադրական եզրակացությամբ ուղարկվեց դատախազին: Այդ փուլում հնարավոր չի դա բողոքարկել: Բայց առաջին դատական նիստը՝ հուսով եմ, մինչեւ սեպտեմբեր կլինի ու խափանման միջոցը կփոխվի»: Հարցին, թե արդյո՞ք փաստաբանը կապում է մեղադրանքը Մինասյանի եղբոր՝ Արծվիկ Մինասյանի ընդդիմադիր քաղաքական գործունեության հետ, նա պատասխանեց. «Չեմ ուզում ինչ-որ բանի հետ կապել, ուղղակի սա թյուրիմացություն է, ինքն իրենով, որը հարթվելու է պարոն Մինասյանի արդարացման դատավճռով: Ամեն ինչ գալու է ի շրջանս յուր, էդիկ Մինասյանը վերադառնալու է իր աշխատանքին»:

Առավել մանրամասն՝ սկզբնաղբյուրում։