Կոբախիձեն նշել է Վրաստանի ու Ռուսաստանի միջև հարաբերությունների կարգավորման պայմանը

Վրաստանի վարչապետ Իրակլի Կոբախիձեն Մոսկվայի հետ հարաբերությունների կարգավորման պայման է ներկայացրել։ Նրա խոսքով՝ Ռուսաստանի հետ հակամարտության խաղաղ կարգավորումը հնարավոր կլինի միայն Աբխազիայի և Հարավային Օսիայի «ապաբռնազավթումից» հետո։
«Ռուսաստանի հետ հակամարտության խաղաղ կարգավորման նախապայմանը վրացական տարածքների ապաբռնազավթումն է։ Սա մեր քաղաքական գիծն ու ուղերձն է», - լրագրողների հետ զրույցում հայտարարել է կառավարության ղեկավարը։
Կոբախիձեն նաև ուշադրություն է հրավիրել երկրի ներսում ընդդիմադիր ուժերի գործողությունների վրա։ Նա պնդում է, որ դրսից եկող հրամանով նրանք միտումնավոր հրահրում են ռուսաֆոբ արշավ՝ ձգտելով էլ ավելի սրել Թբիլիսիի և Մոսկվայի միջև հարաբերությունները։

«Ռուսաֆոբիան և քսենոֆոբիան ընդհանրապես բացարձակապես օտար են վրացական մշակույթին», - ընդգծել է քաղաքական գործիչը։ Նա հավելել է, որ նման սադրանքները վնասում են Վրաստանի տնտեսությանը և պետականությանը՝ հանգեցնելով դրանց փլուզմանը։

Վարչապետը կոչ է արել չտեղափոխել քաղաքական տարաձայնությունները միջանձնային հարաբերությունների դաշտ։ Նա հիշատակել է խառնամուսնությամբ ընտանիքները և Ռուսաստանում վրացական մեծ սփյուռքին, կոչ անելով կանխել ժողովուրդների միջև թշնամանքը։

«Երբ քաղաքականությունը տեղափոխվում է ժողովուրդների միջև հարաբերություններ, դա պետության շահերի դեմ ուղղված միտումնավոր քայլ է, որն ուղղված է դրա ոչնչացմանը: Մենք պետք է անենք ամեն ինչ՝ ժողովուրդների միջև կապերը չվնասելու համար: Մենք չպետք է մոռանանք, որ Վրաստանում և Ռուսաստանում ապրում են բազմաթիվ խառն ընտանիքներ, և Ռուսաստանում ապրում է վրացական մեծ սփյուռք: Հետևաբար, ինչ էլ որ լինի «խորքային պետության» ծրագիրը, մենք չպետք է թույլ տանք, որ քաղաքական անհամաձայնությունները և անցյալի սխալները դառնան ժողովուրդների միջև թշնամանքի հիմք», - եզրափակել է Կոբախիձեն: