«Կաթողիկոսի մասին ավազանի անունով խոսողը խայտառակում է ինքն իրեն»․ Սոս Հակոբյան

«Հայրենիք» կուսակցության մամուլի քարտուղար, փաստաբան Սոս Հակոբյանը ֆեյսբուքյան իր էջում գրել է. «Ցանկացած հոգևոր առաջնորդի դիմում են, իր մասին հրապարակային խոսում են իր պաշտոնական տիտղոսները և անունը հնչեցնելու միջոցով․ սա տարրական բարեկրթություն կամ էթիկա է, հատկապես, երբ պետական պաշտոնյա ես։ Օրինակ՝ Հռոմի Պապի հետ հարաբերությունների ամենալարված պահին էլ բավականին անկանոն խոսք ունեցող ԱՄՆ նախագահի մտքով անգամ չանցավ նրան դիմել իր աշխարհիկ անունով։
Ամենայն Հայոց Կաթողիկոսի մասին հանրային մակարդակում ավազանի անունով խոսողը առաջին հերթին խայտառակում ու պախարակում է իրեն ու իր անունը, և նաև վիրավորում է Հայաստանի և սփյուռքի քրիստոնյաներին, ինչու չէ նաև բոլոր ՀՀ քաղաքացիներին։ Սա երբեք չպետք է համարվի նորմալ, կամ թույլատրելի արարք մեր հասարակությունում...»։