«9-րդ գումարման ԱԺ-ն կոչվում է «Մերկացման ԱԺ»»․ Սոֆյա Հովսեփյան

ԱԺ նախկին պատգամավոր Սոֆյա Հովսեփյանի ֆեյսբուքյան գրառումը. «9-րդ գումարման ԱԺ-ն կոչվում է «Մերկացման ԱԺ»։ Այստեղ ոչ թե մերկացնում են, թե ով ումից ինչ է գողացել, խլել՝ այսօր, վաղը կամ իր ժամանակին, ով ում հետ ինչ է արել, ով է ավելի երկար համագործակցել թշնամու հետ, ով է գիրք գրել կամ «բառ ու բան» ստեղծել թշնամու պատվերով, ով է ՀԷՑ-ը խլել, կամ ով ՀԷԿ ունի, ում քեռին է 90-ականներին հարստացել, կամ ով է նույն ճանապարհով գնացել ու ահավոր լկտիացել, ով է նոր իմացել Կողբի եկեղեցու հայտնի նկարի մասին, որը դեռ 2014-15 թվականներից բազմաթիվ քննադատությունների է արժանացել, իսկ 8 տարի ԱԺ-ի մանդատը գրկած պատգամավորը նոր է իմացել դրա մասին, և այլն, այլ մերկացնում են իրենք իրենց՝ իրենց մանրությունն ու թանկ բրենդների տակ թաքցրած հոգևոր էժանությունը։
Տիկնայք և պարոնայք, լռե՛ք…
Բանակն անտերության մեջ է, գյուղացին մենակ կռիվ է տալիս բերքի վաճառքի համար, մանկապարտեզներում երեխաները պապիս ժամանակների սեղաններով ու աթոռներով են յոլա գնում, իսկ դուք ինչերի՞ մասին եք խոսում։
Ընդդիմադիր պատգամավորներ, եթե դուք էլի դրանց հետ ձնագնդի եք խաղալու, ապա դա անօգուտ է։ Իրենք իրենց օրակարգն են առաջ տանում։ Էդ խուժանը չի գիտակցում, որ ինքն ընդամենը իշխանություն է։ Դեռ գլխի չեն ընկել»։