«Առանց հիմնավորման, առանց ծանուցման իմ տաղավարը փակել են»․ «Առինջ մոլ»-ի աշխատակից

«Առանց հիմնավորման, առանց ծանուցման իմ տաղավարը փակել են, ինչ որ թուղթ է վրեն կպցրած, բայց չեն թողնում ներս գնանք, տեսնենք, թե ինչ ա գրված։ Երբ ես քննչականում հարցրել եմ, թե ինչու երկուշաբթի օրով են փակել, որ այդ օրը շուկան չի աշխատում՝ ասել են, որ դա դիտավորյալ է արվել, որ մարդ չլինի, որ չխանգարեն իրենց»,- լրագրողների հետ զրույցում հայտնեց «Առինջ մոլ»-ի աշխատակիցներից մեկը։
«Մենք այս տարածքների վարձակալներն ենք, պետք է ինչ-որ ձևով մեզ տեղեկացվեին, որ մեր խանութները երկուշաբթի օրվանից կապարակնքվելու է և մենք թեկուզ մեր անձնական իրերը խանութներից վերցնենք։ Ու այսօր քննչականը մեր հարցերին ոչ մի ստույգ չպատասխան չի տալիս, ասեցին միայն, որ հնարավորություն կտան մեր ապրանքը հանեք խանութից, բայց ես այդ ապրանքը տանելու տեղ չունեմ։ Անձնագիրս է խանութում, ասում են՝ դիմում գրեք, որ ուզում եք վերցնել, ձեր դիմումը կքննարկեն»,- նշեց զրուցակիցը՝ հավելելով, որ խոսել են նաև տնօրինության հետ, իրենք էլ հստակ պատասխան չեն տվել, թե երբ կբացվի։