«Ուժեղ Հայաստան» դաշինքից պատգամավորի թեկնածու Սասուն Բադոյանն ազատ է արձակվել

«Ուժեղ Հայաստան» դաշինքից պատգամավորի թեկնածու, Գավառի գրասենյակի պատասխանատու Սասուն Բադոյանն ազատ է արձակվել։ Նրա դուստրը՝ փաստաբան Մերի Բադոյանը, ֆեյսբուքյան իր էջում լուսանկար է հրապարակել ու կից գրել է. «Գնում ենք տուն: Որոշումը բեկանված է՝ հիմնավոր կասկածի բացակայության հիմքով»։

Այս գործի առնչությամբ փաստաբան Վան Սիմոնյանն էլ հավելել է. «Ակնհայտ ապօրինի կալանքը վերացվեց:
Վերաքննիչ քրեական դատարանը, դատավոր Հովակիմյանի նախագահությամբ, բավարարել է իմ կողմից ներկայացված հատուկ վերանայման բողոքը և մերժել է կալանքը որպես խափանման միջոց կիրառելու վերաբերյալ քննիչի միջնորդությունը՝ հիմնավոր կասկածի բացակայության հիմքով: Գրեթե մեկուկես ամիս ակնհայտ անհիմն կալանավորված պաշտպանյալս այսօր ազատ արձակվեց: Շնորհակալությունս եմ հայտնում տիկին Հովակիմյանին այսքան սպասված արդարադատության համար»:
Հիշեցնենք, որ Հակակոռուպցիոն կոմիտեն ավելի վաղ ձայնագրություն էր հրապարակել, և այդ ձայնագրության հիմքով Սասուն Բադոյանին կալանավորել էին։ Բադոյանը մեղադրվում էր ընտրակաշառքի գործով։ Սասուն Բադոյանը հերոս Կարեն Բադոյանի հայրն է։