«ԿԸՀ-ն գրանցեց հանրաքվեի նախաձեռնությունը»․ «Եվրասիական Ալյանս»

«Ալյանս» կուսակցության նախագահ Տիգրան Ուրիխանյանը տեղեկացնում է. «ԿԸՀ-ն հանրաքվեի նախաձեռնություն գրանցեց։

Այսօր Կենտրոնական Ընտրական Հանձնաժողովը գրանցեց Հայաստանի Հանրապետությունում հանրաքվե անցկացնելու քաղաքացիական նախաձեռնությունը, որի նպատակն է լրացում մտցնել ՀՀ սահմանադրության մեջ։

Հանրաքվեի նախագիծը գրանցման է հանձնել Նախկին պատգամավոր Տիգրան Ուրիխանյանի հիմնադրած Ալյանս կուսակցության կողմից ձևավորված «Եվրասիական Ալյանս» անվամբ նախաձեռնությունը։ Սահմանադրության մեջ լրացում կատարելու նպատակն է չեզոքացնել և կանխել

2025 թվականի մարտի 26-ին ՀՀ-ում ընդունված «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» ՀՀ օրենքից բխող տնտեսական և սոցիալական վտանգներն ու ճգնաժամը ԵՄ և ԵԱՏՄ մաքսային կարգավորումների անհամատեղելիության հետևանքով։ Նախագծով առաջարկվում է սահմանադրությամբ արգելել ՀՀ-ին ստորագրել այնպիսի միջպետական պայմանագրեր, որոնք ուղիղ հակասության մեջ են մտնում ՀՀ-ի կողմից ստորագրված և արդեն գործող այլ միջպետական պայմանագրերի հետ։

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՍԱՀՄԱՆԱԴՐՈՒԹՅՈՒՆՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ ՕՐԵՆՔԻ ՆԱԽԱԳԻԾ

Հոդված 1. Հայաստանի Հանրապետության Սահմանադրություն 2015 թվականի դեկտեմբերի 6-ի օրենքի 5-րդ հոդվածը լրացնել նոր՝ 4-րդ կետով՝ հետևյալ բովանդակությամբ.

«4. Հայաստանի Հանրապետության կողմից ստորագրված, վավերացված և գործող օրենքներին և միջազգային պայմանագրերին ուղղակիորեն հակասող օրենքներ և միջազգային պայմանագրեր չեն կարող ստորագրվել և վավերացվել»:

Մանրամասն հիմնավորումները ներկայացված են ամբողջական փաստաթղթի մեջ»։