«Ես պատրաստ եմ Պուտինի հետ ուղիղ բանակցությունների». Զելենսկի

Ուկրաինան սպասում է Միացյալ Նահանգներից բանակցային խմբի ժամանմանը, սակայն գործընթացը շատ երկար է տևում։ Այս կարծիքը հայտնել է նախագահ Վլադիմիր Զելենսկին ՆԱՏՕ-ի գլխավոր քարտուղար Մարկ Ռութեի հետ համատեղ հանդիպման ժամանակ:

«Ցավոք, այսօր մենք ուշադրության կենտրոնում չենք։ Իմ կարծիքով, Իրանը Միացյալ Նահանգների համար թիվ մեկ խնդիրն է։ Եվ հետո գալիս է Ուկրաինայի հարցը։ Ցավոք, մենք կանգնած ենք պատերազմների այս հերթում»,- ասել է Զելենսկին։

Նա ընդգծել է, որ Միացյալ Նահանգներն այն երկիրն է, որը կարող է ամենաուժեղ կերպով մղել Պուտինին պատերազմիի դադարեցմանը։ Միևնույն ժամանակ, նշել է Զելենսկին, Ուկրաինայի համար լավագույն տարբերակը կլինի, որ բանակցություններին մասնակցեն և՛ Վաշինգթոնը, և՛ Եվրոպան։
«Պատերազմը այստեղ է՝ եվրոպական մայրցամաքում։ Ես անկեղծորեն հավատում եմ, որ ամենաուժեղ տարբերակը Ամերիկայի Միացյալ Նահանգներն ու Եվրոպայի ներկայացուցիչներն են։ Սակայն, ինչպես ասացի, մեզ համար պատերազմի դադարեցումը դեռևս թիվ մեկ խնդիրն է։ Եվ այլընտրանք չկա։ Եվ այդ պատճառով ես անկեղծորեն ասացի. մենք աջակցում ենք ցանկացած ձևաչափի։ Եվ ես պատրաստ եմ Պուտինի հետ ուղիղ բանակցությունների՝ այս պատերազմն ավարտելու համար, այլ ոչ թե հերթ կանգնել, մինչև բոլորը վերջ դնեն աշխարհի բոլոր հակամարտություններին, և այդ ժամանակ նոր մեր հերթը գա», - հավելեց Զելենսկին։

Ավելի վաղ նախագահի աշխատակազմի ղեկավար Կիրիլո Բուդանովը հայտարարել էր, որ շուտով սպասվում է ամերիկյան պատվիրակության այց Կիև։ Նա նաև ասել է, որ պատվիրակությունը պլանավորում է այցելել Մոսկվա։ Նա նաև ընդգծել է, որ խաղաղության բանակցություններում որոշակի գործընթացներ շարունակվում են, բայց դրանք հրապարակային չեն։