Հնագույն «մոթել» Մարսելի մերձակայքում. հայտնաբերվել է հռոմեական բաղնիք

Ֆրանսիայի հնագիտական հետազոտությունների ազգային ինստիտուտի (Inrap) մասնագետները Մարսելից 20 կիլոմետր հեռավորության վրա գտնվող Ժեմենոս համայնքում բացառիկ հայտնագործություն են կատարել։ Պեղումների արդյունքում հայտնաբերվել է հին հռոմեական համալիր, որը հնագույն ճանապարհով բաժանված է եղել երկու մասի. մի կողմում գյուղատնտեսական հողատարածքներն ու խաղողի այգիներն էին, մյուսում՝ տարբեր շինություններ, որոնց մեջ առանձնանում են անտիկ թերմերը (բաղնիքները)։
Հետազոտողների պնդմամբ՝ բաղնիքների այս համալիրը չափազանց մեծ է մասնավոր տան համար, սակայն փոքր է ամբողջ բնակավայրի համար նախատեսված հասարակական թերմ լինելու համար։ Այս հանգամանքը հիմք է տվել ենթադրելու, որ համալիրը ծառայել է՝ որպես ճանապարհամերձ հյուրանոցային կամ պանդոկային կառույցի մաս՝ նախատեսված ճամփորդների հանգստի համար։
Ավերակների մեջ հնագետները հայտնաբերել են հիպոկաուստի՝ հին հռոմեական ջեռուցման համակարգի մնացորդներ, որն ապահովում էր տաք օդի մուտքը սենյակներ հատակի տակ գտնվող հատուկ խորշերով։ Բացի այդ, պարզվել է, որ բաղնիքի պատերի մի մասը զարդարված է եղել որմնանկարներով, որոնց բեկորները նույնպես գտնվել են պեղումների վայրում։ Նախնական տվյալներով՝ այս թերմերն ակտիվորեն օգտագործվել են մեր թվարկության 1-ինից 3-րդ դարերի ընթացքում։