«Երևանի Կարմիր բերդն ամենախորհրդավոր պատմամշակութային հուշարձանն է». Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը. «Ինձ թվում է, որ քիչ են Երևանի Կարմիր բերդի տեղն իմացողները: Հայաստանում տեսածս ամենախորհրդավոր պատմամշակութային հուշարձանն է: Գտնվում է Զովունիի ծայրամասում և կառուցված է Հրազդանի կիրճին հայող հրվանդանի վրա: Երեք կողմից անդունդներ են, իսկ մուտքի կողմից պարսպապատ է: Նախաուրարտական է, թեև պարսպի հյուսիսային հատվածի շարվածքի մեջ առկա շեկավուն քարե սալի վրա փորագրված է ուրարտական սեպագիր արձանագրություն: Լսել եմ, որ սա «մեռյալների քաղաք» է, բայց վստահ չեմ, որ դա ճիշտ որակում է: Տարածքում փոխկապակցված բազմաթիվ շինությունների, պարիսպների, անցուղիների փլատակներ կան: Բայց կարևորը դրանք չեն, այլ այն շատ յուրօրինակ զգացողությունը, որ առաջացնում է այդ վայրը: Կարծես Տիեզերքի հետ ուղիղ կապի հանգույց լինի, ուր կյանքն ու մահը մի տեսակ ներդաշնակ ու նույնական են, միաժամանակյա գոյության համազոր տարրեր են»: