Սիրիայից և Իրաքից Հայաստան տեղափոխված անձինք խնդրանքով դիմել են Նիկոլ Փաշինյանին

Այսօր՝ ապրիլի 25-ին, լարված իրավիճակ էր ստեղծվել Երևանում՝ Մոլդովական 29/2 հասցեի շենքում։ Շենքի երրորդ հարկի թվով 13 բնակարանների բնակիչները բողոքի ձայնն էին բարձրացրել՝ նշելով, որ կարող են մեկ տարվա ընթացքում զրկվել իրենց բնակարաններից։ Բնակիչները SHAMSHYAN.com-ի հետ զրույցում նշել են, որ իրենք Սիրիայից և Իրաքից Հայաստան տեղափոխված անձինք են, որոնք արդեն շուրջ երկու տասնամյակ բնակվում են տվյալ հասցեում։ Նրանց խոսքով՝ այդ ընթացքում բոլորը ստացել են ՀՀ քաղաքացիություն, բարեխղճորեն օգտագործել են իրենց հատկացված բնակարանները, կատարել կոմունալ վճարումները և անհրաժեշտության դեպքում իրականացրել վերանորոգման աշխատանքներ։ Բնակիչների փոխանցմամբ՝ նախկինում շենքում գործել է «Հանրակացարաններ» ՊՈԱԿ-ը, որի միջոցով էլ իրենց տրամադրվել են բնակարանները։ Նրանք նշում էին, որ վերին հարկերի բնակիչների մի մասը կարողացել է օգտվել օրենքով սահմանված հնարավորություններից և ձեռք բերել սեփականության վկայականներ։ Սակայն իրենց դեպքում այդ գործընթացը չի իրականացվել։ Նրանց խոսքով՝ 2026 թվականի հունվարի 28-ին շենք են այցելել ՀՀ աշխատանքի և սոցիալական հարցերի նախարարության «Օթևան» ՊՈԱԿ-ի աշխատակիցները և առաջարկել ստորագրել նոր պայմանագիր, որի համաձայն՝ բնակիչները պետք է մեկ տարվա ընթացքում կարգավորեն իրենց բնակարանային հարցերը, հակառակ դեպքում մինչև 2027 թվականի փետրվարի 1-ը պարտավորվում են ազատել բնակարանները։ Բնակիչների պնդմամբ՝ պայմանագիրը չստորագրելու դեպքում իրենց տրվելու է ընդամենը 24 ժամ՝ տարածքը լքելու համար։ Նրանք նշում էին նաև, որ իրենց տեղեկացվել է, թե «Հանրակացարաններ» ՊՈԱԿ-ը լուծարվել է, և դրա իրավահաջորդ կառույցն է այժմ զբաղվում հարցով։ Բնակիչները դիմում են ՀՀ վարչապետ Նիկոլ Փաշինյանին և ՀՀ կառավարությանը՝ խնդրելով թույլ չտալ, որ իրենք անօթևան դառնան, և հնարավորություն ընձեռել օրենքի շրջանակում, ինչպես մյուս բնակիչները, ձեռք բերեն իրենց բնակարանների սեփականության վկայականներ։