«Ինչպե՞ս է Նոր Հայաստանում հնարավոր ավտոմեքենա գնել կամ վաճառել». Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը. «Ինչպե՞ս է Նոր Հայաստանում հնարավոր ավտոմեքենա գնել կամ վաճառել:
Ունենք երկու քաղաքացի՝ ավտոմեքենա վաճառողն ու գնողը: Առուվաճառքի գործարքը պետք է իրականացվի կամ առցանց եղանակով, կամ ՀՀ ներքին գործերի նախարարությունում՝ Հայաստանի տարածքում գործող որևէ հաշվառման-քննական բաժնում (ՄՌՈւ): Առցանց եղանակով առուվաճառքի գործարք կատարել հնարավոր չէ: Շուրջ 4 օր գործարքների առցանց հարթակը չի աշխատում: Ընդ որում, պետական տուրքերն ու վճարները գանձվում են և դրանից հետո ծրագիրը սկսում է «չաշխատել»: Մեր հերոսներն այդ եղանակով երկու անգամ պետական տուրքեր են վճարել, սակայն ապարդյուն: Գործարքը չի կատարվել: Ի վերջո, հերոսները որոշեցին գնալ Մեծամորում գտնվող ոստիկանության հաշվառման-քննական բաժին և ավտոմեքենայի առուվաճառքն այնտեղ կատարել: Առավոտից Մեծամորի հաշվառման-քննական բաժնում ինտերնետ չկար: Այն տվեցին մոտ 12:00-ի սահմաններում: Դրանից քիչ անց աշխատակիցները հայտարարեցին, որ ընդմիջման են գնում: Այլևս համբերելն անհնար էր: Հերթը մեծանում էր: Բաժնի պետն առավոտից չկար: Մեր հերոսներից մեկը՝ ավտոմեքենայի գնողը, չդիմացավ: Վերջինս զանգահարեց նախկինում ուժային ոլորտում բարձր պաշտոն զբաղեցրած իր բարեկամին: Մոտ 25-30 րոպեից մեր հերոսներին է մոտենում մեկը, ով բաժնի պետի անունից ավետում է, որ նրանց գործը շուտափույթ և առանց հերթ կանի: Անում է: Հերոսները գոհ են: Վերջիններիս մնում է պարզել չկայացած առցանց գործարքների ընթացքում վճարված պետական տուրքերի ճակատագիրը և վերադարձնել դրանք: Կարծում եմ՝ հերոսների մոտ դա կստացվի: Վերջիններս կրկին ծանոթ-բարեկամներին կդիմեն:
Ճիշտ էր ասում Նիկոլ Փաշինյանը՝ Հայաստանի հարկատուները հերոսներ են: Նրանք ամեն ինչ կարող են»: