«Իմ տեղեկություններով՝ Պարգև սրբազանը նույնպես դեմ է Գարեգին Բ-ի գահակալությանը»․ Թաթուլ Հակոբյան
157
Երեքշաբթի, 02 դեկտեմբերի, 2025 թ., 13:00
Լրագրող Թաթուլ Հակոբյանի ֆեյսբուքյան գրառումը. «Հայ Առաքելական եկեղեցու Արցախի թեմի առաջնորդ Վրթանես եպիսկոպոս Աբրահամյանի՝ մեկ տասնյակ եպիսկոպոսների հետ վարչապետ Փաշինյանի հետ հանդիպումը զայրացրել է արցախահայությանը: Անշուշտ, կարող են լինել արցախահայեր, ովքեր ճիշտ կհամարեն Վրթանես սրբազանի քայլը, բայց շատ ու շատ ավելի են նրան քննադատողները: Բավական է կարդալ այն նյութի մեկնաբանությունների բաժինը, որտեղ սրբազանը բացատրում է իր քայլը: Վրթանես սրբազանի քայլը՝ դուրս գալը Կաթողիկոսի դեմ, կանոնականից ու քաղաքականից բացի նախ և առաջ դիտարկվում է բարոյական հարթության մեջ: Արցախահայությունը, ավելի ճիշտ՝ արցախահայերի մեծ մասը, վարչապետ Փաշինյանին է մեղադրում Արցախում կրած պարտության ու Արցախի հայաթափումը կանխելու անզորության մեջ: Իմ տեղեկություններով՝ Վրթանես սրբազանը Արցախի թեմի առաջնորդ է նշանակվել Պաշտպանության նախկին նախարար Սեյրան Օհանյանի՝ Ամենայն Հայոց կաթողիկոսին ուղղված խնդրանքին ընդառաջ: Վրթանես սրբազանը փոխարինեց Պարգև արքեպիսկոպոս Մարտիրոսյանին, որը 44-օրյա պատերազմից հետո մեկնեց ԱՄՆ՝ Լոս Անջելես, բուժման նպատակով: Իմ տեղեկություններով՝ Պարգև սրբազանը նույնպես դեմ է Ամենայն Հայոց կաթողիկոս Գարեգին Բ-ի գահակալությանը և նախկինում աջակցել է Վեհափառի դեմ շարժմանը՝ չհրապարակայնացնելով իր կեցվածքը: Քանի որ խոսք բացվեց Գարեգին Բ-ի դեմ արշավի մասին, նշեմ նաև, որ եկեղեցու ներսում Ամենայն Հայոց կաթողիկոսի դեմ արշավը և նրա հրաժարականի պահանջն առաջ են տանում հիմնականում երկու եպիսկոպոսներ, որոնք ստորագրել են նրա հրաժարականը պահանջող հայտարարության տակ: Այդ երկու սրբազաններն են՝ ԱՄՆ Հայոց Արևմտյան թեմի առաջնորդ Տ. Հովնան արքեպիսկոպոս Տերտերյանը և Բալթյան երկրների հայոց թեմի առաջնորդ Տ. Վազգեն արքեպիսկոպոս Միրզախանյանը: Նշեմ նաև, որ երբ Տավուշի թեմի առաջնորդ Բագրատ արքեպիսկոպոս Գալստանյանը Կիրանցից սկսեց իր սրբազան անվանումը ստացած շարժումն ընդդեմ վարչապետ Փաշինյանի՝ Վազգեն արքեպիսկոպոս Միրզախանյանը եղել է այն սակավ բարձրաստիճան հոգևորականներից, որը Գարեգին Բ-ին առաջարկել է չաջակցել Տավուշի թեմի առաջնորդին և նրան ու նրա ներքաղաքական պայքարը դուրս դնել Մայր Աթոռից»:
