«Հետաքրքիր կլիներ, եթե ՀՀ-ն դիմեր ԱՄՆ-ին՝ Միջազգային կայունացնող ուժերին (ISF) մաս կազմելու առաջարկով»․ Արմեն Պետրոսյան

Տարածաշրջանային հարցերով փարձագետ Արմեն Պետրոսյանի ֆեյսբուքյան գրառումը․ «Գուցե ոչ միանշանակ է գրածս, բայց բավականաչափ հետաքրքիր կլիներ, եթե Հայաստանը դիմեր ԱՄՆ-ին Գազայում Դոնալդ Թրամփի խաղաղության ծրագրի իրականացման նպատակով ձևավորվելիք Միջազգային կայունացնող ուժերին (ISF) մաս կազմելու առաջարկով։
Եթե առաջարկն ընդունվի ԱՄՆ-ի և Իսրայելի կողմից, ապա դա միանշանակորեն կարող է նպաստել ինչպես Վաշինգտոնի հետ հարաբերությունների ավելի խորացմանը և համագործակցության բազմազանեցմանը, այնպես էլ Իսրայելի հետ բարդ, բայց կարևոր հարաբերություններում դրական տեղաշարժին։
Միևնույն ժամանակ, հնարավոր է նաև, որ անգամ ԱՄՆ-ի համաձայնության դեպքում Իսրայելը մերժի Հայաստանի ներգրավումը, ինչպես, օրինակ, Թուրքիայի և Ֆրանսիայի դեպքում։
Որպես մերժման հիմնավորում՝ կարող է ներկայացվել Հայաստանի կողմից 2024 թ. Պաղեստին պետությունը ճանաչելու հանգամանքը։ Գուցե նաև դրա պատճառ կարող է լինել Իսրայել-Ադրբեջան փոխհամաձայնությունը, այս անգամ արդեն Բաքու-Երևան մրցակցության և Հարավային Կովկասում Վաշինգտոնի բացառիկ գործընկերը դառնալու Բաքվի մղումների համատեքստում։
Հարկ է նշել, որ խաղաղապահ ուժերին կարող են մասնակցություն ունենալ Եգիպտոսը, Կատարը, ինչպես նաև դրանց միանալու պատրաստակամություն են հայտնել Պակիստանը, Ինդոնեզիան, Ադրբեջանը, Ավստրալիան, Մալայզիան, Կանադան, Ֆրանսիան, Կիպրոսը։ Դրանց շրջանակի վերջնական համաձայնեցումն ամրագրվելու է ԱՄՆ-ի և Իսրայելի միջև բանակցություններում։
Անվտանգության հարցում, իհարկե, խաղաղապահ առաքելության գործունեության գոտին լիովին անվտանգ չէ, բայց իրավիճակը մեծապես կառավարելի է»։