Վաղարշապատի թիվ 1 դպրոցի ուսուցիչների բողոքի ակցիան՝ ԿԳՄՍՆ-ի դիմաց

Այսօր Վաղարշապատի թիվ 1 դպրոցի մի խումբ ուսուցիչներ հավաքվել են ԿԳՄՍ նախարարության շենքի մոտ՝ պահանջելով տնօրենին չհեռացնել աշխատանքից։ Ինչպես նշել են ուսուցիչները, տնօրենը մեղադրվում է պաշտոնավարման ընթացքում քաղաքական զսպվածություն չցուցաբերելու մեջ, որի պատճառով հեռացվել է աշխատանքից։ «Մենք հավաստիացնում ենք, որ նման բան մեր դպրոցում տեղի չի ունենում և մեղադրանքն անհիմն է։ Դիմում ենք պատրաստել և՛ վարչապետին, և՛ ԿԳՄՍ նախարարին: Կպասենք նախարարի պատասխանին, նոր հետո կդիմենք կառավարությանը»,- ասել է ուսուցիչներից մեկը։ «Բարի ու ազնիվ մարդուն առաջադրվում է մեղադրանք, որում ինքը, բնավ, ոչ մի մեղավորություն չունի։ Նա աշխատել է Էջմիածնի մի քանի դպրոցներում, կուզենայինք, որ գոնե անունը մաքրվի, եթե անգամ աշխատանքի ինքը չվերադառնա»,- ավելացրել է ուսուցիչը։