«Դա կարող էր սխալմունք լինել»․ Թրամփը՝ ռուսական ԱԹՍ-ների՝ Լեհաստանի օդային տարածքը հատելու մասին

ԱՄՆ նախագահ Դոնալդ Թրամփը, դատապարտելով ռուսական անօդաչու թռչող սարքերի ներխուժումը Լեհաստանի օդային տարածք, հայտնել է, որ դա կարող էր տեղի ունենալ ոչ միտումնավոր։ Այս մասին հաղորդում է Bloomberg-ը։

«Դա կարող էր սխալմունք լինել, բայց ամեն դեպքում, ես գոհ չեմ այս ամբողջ իրավիճակից», - Սպիտակ տանը լրագրողներին ասել է Թրամփը՝ հույս հայտնելով, որ «դա կավարտվի»։

Թրամփը հավելել է, որ դատապարտում է Ռուսաստանին «նույնիսկ այս գծին մոտ լինելու համար»։ «Ինձ դա դուր չի գալիս։ Ես գոհ չեմ դրանից», - ասել է նախագահը։

Հիշեցնենք՝ սեպտեմբերի 10-ի գիշերը, երբ Ռուսաստանը զանգվածային հարվածներ էր հասցրել Ուկրաինային, 19 անօդաչու թռչող սարք է հատել Լեհաստանի սահմանը։ Լեհական ինքնաթիռներից բացի, անօդաչու թռչող սարքերը որսալու համար օգտագործվել են նաև ՆԱՏՕ-ի այլ երկրների կործանիչներ։